ПӦЧ


Йӧз шы вуджис му-видз вылӧ,
Став грезд колис тыртӧм дзик,
Сӧмын пӧчӧ чӧрснас, кылӧ,
Кывтын сюргӧ ньӧжйӧник.

Ныр-вом, ки-кок пӧчлӧн сімӧсь,
Тӧдан, вывті важӧсь нин!
Кузь шог гӧрӧм сылысь кымӧс.
Сӧмын вель на югыд син.

Чукыра та паръяс вылын
Серам оз нин тӧдчывлы,
Уджтӧг оз нин овсьы сылӧн,
Уджтӧг зэв шог пӧчӧлы!

Дзугыль пӧчӧ печкӧ, печкӧ,
Ыджыд пыш тош печканас;
Ӧти кинас тошсӧ нетшкӧ,
Мӧднас сунис нюжӧдас.

Вугыртӧм мысьт мукӧддыръя
Бара пыр и палялас!
«Он тай уджышт та ун пыръя!
Сёйны сёя!» — видчыштас.

Кодыр карнан, кодыр тоин
Сёрсянь джоджӧ усьласьӧ —
Жеб ки пуктӧм! «Эськӧ воин,
Ортӧй, кучкин морӧсӧ!»

Со сумлабич вылын мыськӧ
Нырсӧ, куньмысьт синсӧ, кань.
«Керка чышкыштны мем. Кыськӧ
Локтас гӧсьт зэв, гашкӧ, шань».

Сутшиктӧдас. «Тэ кӧть, пиӧ,
Сибырад сэн гаралышт
Мамсӧ. Шуда нэм ло сійӧ!..»
………………………..

(1866)