ПӦРЫСЬ НЫВ


Эг ӧмӧй нӧ ме вӧв мелі,
Эг ӧмӧй вӧв том?
Мыйла инӧ пӧрысь нылӧн
Суи нэмлысь пом?

Йӧз моз морӧсын эм сьӧлӧм,
Сӧнын сӧстӧм вир…
Мыйӧн зонъяссӧ нӧ мукӧд
Сибдӧдӧны пыр?

Наяннас-ӧ, рамнас, лёкнас?
Ӧткодьӧсь тай ми…
Кодыр тойыштлан, кор кыскан,
А со пӧрысьми!

Меям сёрни-й ӧні овлӧ
Медся шмонитан,
Мый нӧ, бур зон, сералан-а,
Меысь бергалан?

Мед он дзугыльмы нин мекӧд,
Ме со жеръяла
Ас вылын и йӧз вылын пыр —
Тэд пыр немторла!

Сёйныд оз ков, кор эм сёрни
Мукӧд нывъяскӧд;
Некодсянь тай мамысь кындзи
Бур кыв ме ог тӧд!

Дзирыдпоз! Мый ветлан-гыан!
Со тэд менам водз —
Латшкысям медъюгыдінас…
Сэн тай! Лӧсьӧд содз!

Чӧлӧ мывкыд-вежӧрнаныд!
Письки чужӧма —
Сы вӧсна ме ог туй? Чӧлӧ!
Сідз нин сиӧма…

Томджык нывъяс верӧс сайӧ
Мый нин муналіс!
Мыськаси да вурси пыр ме
Мунігкежаныс!

Муса мортлы кыны-вурны
Абу сиӧм мем;
Лӧсьӧдышта жӧ кӧть йӧзлы…
Йӧзлы быдса нэм!

Ен мед накӧд! Шуда олӧ!
Керка вевт вывсянь
Уськӧдчыны изъяс вылӧ
Колӧ мем… да шань!

Китӧм, коктӧм лоан бара,
Он ӧд кув на! Ок!
Олышта жӧ, кодыр эм на
Менам ки да кок!

1862