АБРИС

«Уджав, помав! Регыд
Со ӧд сартас бырас;
Эн сёй вой-лун сідзи!
Кодыр уджыд тырас?

Оз кӧ тӧждысьӧд удж,
Водан вольпась вылӧ,
Унмовсян и аддзан
Мича вӧт тэ, нылӧ!»

Сідзи мывкыд пӧчӧ
Вӧйпӧдіс том нывлы;
Татшӧм вӧйпӧдӧмӧс
Ме и ачым кывлі.

«Шондісӧ ен пешӧм, —
Кодкӧ меным шуӧ, —
Кор эз кус на тэныд,
Мед пӧ уджыд пуӧ!

Уджав, морт нэм дженьыд!—
Тэрмӧдлӧ пыр менӧ
Кодъя: эн чайт, сё во
Югыд оз видз тэнӧ!

Уджав! Кад тэд сетӧм
Сӧмын бурӧн лоны;
Дышӧ, пӧръясьысьӧ
Некор тэд и воны!

Уджав, помав уджтӧ
Регыдджык; тэд ӧні
Гуад куйлігкежӧ
Бур вӧт лӧсьӧдӧны…»