* * *

Шуда здукӧ чужан керка стенын
Ӧшкамӧшка югнитлывлӧ меным.
Куньтырасьӧ уна рӧма синнас,
Сьӧлӧм шӧрӧдз мелілуннас инмӧ.

Серпасалӧ кӧмтӧм кока олӧм:
Батьӧн пестӧм бипур дінӧ вола,
Мамлӧн банйӧм кӧвдумъясӧн пӧтла,
Купальнича горйын вомидз вӧтла.

Тяпка пӧчлӧн шомакоръя руньӧн,
Бобе гагйӧс сьылӧда бур туйӧ,
Сюрукъяскӧд ыркӧдча лӧнь ваын,
Чурскӧдчышта дзоридз кӧра маӧн.

Юмов кадӧй кольӧма нин бокӧ.
Сӧмын унаысь на кӧмтӧм кокӧн
Тупыльтчыла карсянь сиктса гортӧ
Вочаасьны уна рӧма ёрткӧд.


   Пасйӧд:
   Бобе гаг  (диал.) — енгаг.