РИМСКӦЙ ПАПА ШУИС ТШАПА


Римскӧй папа
Шуис тшапа:
«Сӧвет власьтлы вӧча пом!
Аслам киӧн
Сота биӧн,
Сӧмын коляс ӧти шом!
Тадзсӧ керны —
Биӧн зэрны
Оз кӧ отсав меным ен,
Войска ӧкта,
Сэсся тшӧкта
Ставсӧ путкылявны сэн!
Уна миян
Буржуй пиян,
Уна перна новлысь морт.
Мувыв страсьтлы —
Сӧвет власьтлы
Регыд вундыштам ми борд!»
Тадзи горзіс,
Бинас ворсіс
Римын олысь папа Пий.
Увгис збоя:
«Ме пӧ сёя
Эсэсэртӧ, кӧть тэ мый!»
Шуис сылы,
Кристос пилы,
Сӧветувса вӧльнӧй йӧз:
«Кӧть тэ скӧрман,
Сӧмын верман
Синтӧм гутлы кыны вез.
Эсэсэрын
Октябр бӧрын
Этша коли синтӧм гут.
Кывзы, папа,
Тэнад лапа
Синма войтырӧс оз кут!
Тэысь повны,
Ен ног овны
Важӧн вунӧдім нин ми.
Тэнад Римыд,
Сэсянь гымыд
Некор миянӧс оз ви!
Дзӧрныд дугды,
Пурттӧ пукты,
Пиньтӧ весьшӧрӧ эн йир.
Сӧвет власьтыд —
Тэнад страсьтыд
Миян му вылысь оз быр!
Эгӧ тешӧн
Нёль во чӧжӧн
Тыртім ми витвося план.
Регыд рамман,
Ланьтныд сямман,
Война ӧзтысь Ватикан!
Регыд потас,
Няйтӧ водас
Капиталлӧн енэжвыв,
Тэныд, папа,
Зарни шляпа,
Татшӧм миян вочакыв!»