КОМИ ВӦР ШУВГӦ


Лыдтӧм во чӧж сулаліс да шувгис
Небыд шыӧн пӧрысь коми вӧр,
Лэчыд тӧвкӧд яра вензис, увгис,
Скӧрмылігас ку пытшкас оз тӧр.

Уна эмбур видзис сійӧ муас,
Ас улас, мед ловъя морт оз тӧд.
Мукӧддырйи шувган шынас шуас:
«Озырлунӧс некодлы ог сет!»

Тадзи вӧвлі коркӧ важӧн-важӧн.
Му пыр муніс важся шуштӧм кад.
Коми вӧрыс тырис югыд гажӧн,
Лоис быттьӧ дзоридзалан сад.

Сӧветса сюсь войтыр коми вӧрӧ
Воис корсьны муысь озырлун.
Смела, збоя пырис парма шӧрӧ,
Кыдзи мойдын ыджыд вына тун.

Озырлунсӧ перйигӧн сэн вӧлі
Сьӧкыдлункӧд чорыд-чорыд кось.
Коми вӧрлӧн шувгӧм вӧлі мелі:
«Муса войтыр, лок да ставсӧ босьт!»

Ми и босьтам, ми и перъям сэтысь
Нефть да ылі войвывса из шом.
Миян муным лышкыд, быдтор сетысь,
Миян озырлунлы абу пом.

Эжва юсянь Печоралань мунӧ
Поезд бӧрся поезд лун и вой.
Йитчасны кӧрт туйӧн гажа лунӧ
Эжва ю да Печора, кык чой.

Видзӧдӧ кӧрт туй вылӧ да шуӧ
Шензигтырйи пӧрысь коми вӧр:
«Зэв чудеснӧй олӧм Сӧвет муын,
Вежсис весиг миян парма шӧр.

Кыті сӧмын шӧйтісны лёк зверьяс,
Паровозъяс грымӧдӧны сэт.
Быдтор вӧчас, артмӧдас да перъяс
Большевистскӧй водзмӧстчӧм да ӧд».

1941 во.