МИЯН КОЛХОЗЫН


Во чӧж колхозаным миян
Юралӧ кыпыд удж гор,
Арсяньыс му вылӧ сійӧ
Петкӧдӧ куйӧд да торф.
Эбӧслун сюйӧны муӧ,
Тонна лыд кытчӧдз оз тыр.
Зіль йӧзлӧн уджыс тан пуӧ,
Зіль йӧзлӧн выныс оз быр!

Бур инвентарьяс ми вӧчам,
Дасьтысям-керам быд лун,
Мӧдысь мед гӧриг да кӧдзиг
Весьшӧрӧ кадыс эз мун.
«Быдтор ми лӧсьӧдам», — шуӧ,
Нюмъялӧ том бригадир.
Зіль йӧзлӧн уджыс пыр пуӧ,
Зіль йӧзлӧн выныс оз быр!

Матыстчис шондіа тулыс,
Ставыс сэк ловзис ӧтдруг.
Тырмӧ колхознӧй став мулы
Кӧйдыс, и трактор, и плуг.
Пӧрысь и том сэні жуӧ,
Уджалӧ, гӧрӧ лунтыр.
Зіль йӧзлӧн уджыс тан пуӧ,
Зіль йӧзлӧн выныс оз быр!

Гожӧмын нянь быдмӧ бура.
Видз вылын воссис выль удж:
Ытшкӧны, куртӧны турун,
Лунтыр оз пуксьывны сутш.
Ёрт шуӧ ёртыслы: «Суӧд!
Ытшкам вай ордйысигтыр».
Зіль йӧзлӧн уджыс пыр пуӧ,
Зіль йӧзлӧн выныс оз быр!

Арланьыс босьтчисны ставӧн
Му вылысь идравны нянь.
Бур урожай воис таво.
Муркӧдчӧ сэні комбайн.
Озырлун содӧ да туӧ,
Няньӧн колхознӧй склад тыр.
Зіль йӧзлӧн уджыс пыр пуӧ,
Зіль йӧзлӧн выныс оз быр!

1948 во.