ЗАРНИ ЧИКЫШ


Зарни чикыш, лэптысь вылӧ,
Вынсьӧд ассьыд тэрыб борд.
Сэсся лэб зэв ылӧ, ылӧ,
Сэтчӧ, кӧн граница дор.

Сэні менам донаторйӧй,
Пограничник Гриша эм.
Кӧть и олам ӧні торйӧн,
Зэв на муса сійӧ мем.

Сійӧс аддзӧд гажа лунӧ,
Пуксьы сы водзӧ да сьыв.
Висьтав сылы, мый эз вунӧд
Ассьыс Гришаӧс том ныв.

Мед граница сюся видзас,
Зарни чикыш, сылы шу.
Мед пыр лоас шуда, мича
Миян дзоридзалан му.

Мед геройӧн гортӧ воас,
Врагкӧд пансьылас кӧ бой.
Вывті долыд меным лоас,
Донаторйӧй кӧ — герой!

Гриша дінӧ тэнӧ ыста,
Зарни чикыш, тэрыб борд.
Сэтысь воӧм бӧрын висьтав,
Кыдзи олӧ муса морт.

1951 во.