КЫСЬ НИН ӦНІ АДДЗАН


Кольӧма тай, кольӧма шудыс кӧдзыд ёльясас.
Кӧдзӧма тай ас пытшкас сійӧс пемыд вӧр.
Гашкӧ, тюрис-визувтіс сійӧ синва мольяснас,
Гашкӧ, поздіс-овмӧдіс сійӧс тӧдтӧм йӧр...

Быдмӧма пӧ, быдмӧма маръямоляс-дзоридзас,
Кӧнкӧ ылі видзьясас, кӧні косьмӧм нюр,
Дзоридз пыдди кольӧма меным сӧмын кос идзас,
Китыр кодкӧ нетшкӧма, а мем эз и сюр.

Вунӧма тай, вунӧма шудыс вотчанінъясас,
Кӧні лӧзов синъяса кисьмис юмов чӧд.
Эськӧ ме и ветлі жӧ чӧдъя озыринъясас,
Сӧмын тусьсӧ вотӧма вӧлі кодкӧ мӧд...

Киссьӧма тай, киссьӧма зэрӧн шудыс му вылӧ,
Зэрсьыс быдлат ойдӧма тувсов ытва моз.
Сӧмын косьмӧм-тэськасьӧм муыс горша юӧма,
Сӧдзтысьӧма шудъяыс и оз чуж нин, оз.

Тювкнитӧма-усьӧма асъя лысва войт пытшкас.
Зарни рӧмӧн дзирдыштліс ӧшинювса йӧр.
Сӧмын асъядорыс тай кодкӧ лудсӧ ытшкӧма,
Ог тӧд, турун быдмылас, быдмылас-ӧ бӧр?

Локліс эськӧ, локліс да шудыс менам олӧмӧ —
Китӧ сӧмын нюжӧдлы, сӧмын дасьсӧ босьт.
Гашкӧ, эг и кывлы да, гашкӧ, аслам полӧмла,
Сылы весиг ӧдзӧсӧс ассьым тай эг восьт.