УСИС КОДЗУВ


Кодзув усис — войлы воис пом.
Кыдзкӧ вывті тӧдлытӧг да гусьӧн.
Ас пыддиыс колис са да шом —
Усис кодзув, шытӧг, лӧня усис.

Бӧрдіс енэж — бара кулӧ вой.
Синва войтӧн енэж банті тюрис
Эзысь рӧма дзирдӧн бытшкысь дой,
Быттьӧ ема сунис, отсӧ вурис.

Енэж вичко пытшкысь кусі сись,
Быттьӧ воліс кӧдзыд лола тӧв ныр.
Енэж вӧрті зарни куа низь
Вирдыштіс да быттьӧ эз и вӧвлы.

Косьмис дзоридз — сӧмын коли видз,
Кӧні сэтшӧм дзоридзыс дзик тыр на.
Усис кодзув — сӧмын усис сідз,
Мый и мукӧд кодзулыс на тырмӧ.

Кусӧм сисьсӧ вежас коркӧ мӧд,
Чужас сідз жӧ — тӧдлытӧг да гусьӧн.
Сӧмын, нимкодясиг, оз на тӧд,
Мый и сійӧ тадз жӧ сылӧ-усьӧ.