ВОЙ ТӦВ


Позтӧм кӧк моз шӧйтӧ талун тӧлыс
И оз аддзы аслыс шоныд поз.
Пышйысь кадлӧн биа-бордъя вӧлыс
Сійӧс сибӧдны оз кӧсйы, оз.

Бӧрдігтырйи ветлӧ ӧшинь увті,
Нетшкӧ-тракйӧ керка ӧдзӧс вуг.
Горттӧм пон моз лимзалӧмӧн увтӧ,
Олӧмыслысь корсьӧ бан и гуг.

Зумыш козкӧд шӧпкӧдчыны ветлас,
Локтас бӧр — и инасьны оз куж.
Унлы здук кежлӧ со асьсӧ венны сетлас,
Видзӧдан да — бара бертӧ вуж...

Вермас — радлӧ, сэсся шогӧ усьӧ:
Ӧткалунсьыс, гашкӧ, асьсӧ жаль,
Олӧмыскӧд лимзалыштас гусьӧн —
Коз дорӧдзыс туйсӧ оз нин таль.

Вӧзйысис да, эз тай сӧлӧд вӧлыс,
Подӧн мунӧ, лэдзӧма со юр —
Позтӧм кӧк моз шӧйтӧ талун тӧлыс:
Сылы иныс талун эз и сюр.