ЕДЖЫД ВИЧКО


Еджыд вичкоас бӧрдӧны сисьяс,
Еджыд вичкоас кӧдзыд да лӧнь.
Ӧшинь костъясӧд шондіысь вӧнь
Ньӧжйӧ кыӧны югӧръяс-визьяс.

Быттьӧ корысьяс, енэжыс дорӧ
Лӧня лэптӧны тіралысь ки.
Сійӧ сисьясыс — абу-ӧ ми?
Енмӧй, мыйла нӧ миянӧс ёран?

Шӧйтӧ вичкоті омлялысь тӧлыс —
Сійӧ некодлы тані оз ков,
Сійӧ — нэм кежлас инасьтӧм лов,
Нэмсӧ ӧтнасӧн — ёртыс ни пӧлыс.

Вичко жынняныс чӧв-лӧньсӧ видзӧ,
Быттьӧ измӧма — кыв джын оз шу.
Сылӧн бувгӧмыс дойсӧ оз ну,
Сылы кокниджык шогсьыны — сідзи.

Еджыд вичкоас узьмӧдчӧ войыс,
Сӧмын сисьяс пыр лэптӧны ки...
Сотчысь сисьясыс — абу-ӧ ми?
Миян сьӧлӧмын абу-ӧ дойыс?