ВАСА НЫВЪЯС


Лӧнь войӧ
Ланьтӧм Сыктыв дорын,
Оз вӧр кор весиг
Турун йыв,
Друг нывлӧн гӧлӧс
Кылас гора,
И муас швачкас
Тэрыб гы.

А сэсся юсьыс
Сьӧрсьӧн-бӧрсьӧн
Нёль васа ныв,
Нёль васа чой...
И быдӧн чери кусӧ пӧрччӧ,
И тыртӧ гажӧн пемыд вой.

Сэн радлӧм, серам,
Сьылан шыяс,
Оз тӧдны шог
Нёль мича ань,
Но тӧлысь югдӧдіс на пиысь,
Код вӧлі медмича,
Медшань.

И ӧзйис сэки менам сьӧлӧм:
Мый тайӧ мичсьыс тэныд, ю?
Ме кысси бадьяс костӧд чӧла
И со нин киын
Чери ку.

Лӧз биӧн ёрӧ
Кӧдзыд дзирдыс,
И кынмӧ чери кусьыс сой
Да сідз, мый весиг босьтіс йирмӧг,
Но, кылӧ,
Локтӧны нёль чой.

Ме аддза пасьтасьӧмсӧ боксянь.
Зэв лӧнь.
Оз вӧрзьы турун йыв.
Дзик ӧтнас колиг,
Корсьӧ-ноксьӧ
Да нора бӧрдӧ
Мича ныв.

То ӧдйӧ чепӧсйылас валань
И кевмӧ,
Лэптӧ кыкнан ки,
То локтӧ бӧр
И кевмӧ бара...
Ме сувті.
Орччӧн лоим ми.

Юр весьтын тӧлысь
Быттьӧ сыліс,
Вӧр-васӧ шымыртіс сьӧд вой.
Сы водзӧ сувті
Пидзӧс вылӧ
И восьті ассьым сьӧлӧм дой.

— Сувт, морт,
Эн зіль ас нэмтӧ шогны, —
Тадз шуис ныв и сетіс ки.
— Тэд эз ков, эз ков татчӧ локны,
Ме — васа ныв,
Тэ — мулӧн пи.

Став тэнад тӧждъясӧдз
Зэв ылын,
Кӧть аддза, кыдзи вежсьӧ му.
Удж шыяс лун и вой кӧть кыла,
Мем мусьыс дона
Кӧдзыд ю.

Тэн ва оз сет,
Мед сьӧлӧм сотчис
Да олӧм дженьыд лои мед.
Тэ ассьыд нэмтӧ видзан сэтчӧ,
Час кытчӧ ассьым ме ог сет.

Ог кӧсйы кӧдзыдлунсӧ венны
И, сэк жӧ, крепыд сылӧн власть.
Эн дивит, морт,
Ме эска тэныд.
А ӧні войкӧд муна тась.

Ныв мыччис чуньяссӧ
И суніс.
Мый вӧчны водзӧ —
Ме эг тӧд,
Но войыс исковтіс
И вуні
Лӧнь Сыктыв дорын мича вӧт.