КАРЫН НИМЪЯС ЙЫЛЫСЬ


Со автобус.
Тырыс йӧз.
Вайӧ, прӧйдитчамӧ подӧн —
Луныс шоныд,
Енэж лӧз,
Да и дзоньвидзалун содас.

Быдмӧ-сӧвмӧ
Сыктывкар,
Водзын — ӧкмыс судта керка.
Коркӧ тані пӧ
Быд ар
Тшакыс вӧлӧм — сӧмын бергав!

Пӧльӧй
Тшак эз вотлы тась —
Сійӧ овліс Сыктыв катыд.
Ёртӧй,
Заклад вартны дась,
Мый и тэ эн чужлы татӧн.

Унджыкыс ми —
Сиктса йӧз,
Кӧть и карсаясӧн шусям.
Юр кыскавлім,
Видзлім мӧс,
Тӧдам, мыйӧн вына мусин.

Быдтіс-вердіс
Коми сикт,
Эгӧ петлӧй вошӧм рӧдысь.
Вужъяс мед
Эз орны дзик,
Волам вонас ӧтчыд-мӧдысь.

Коми сиктлы —
Помтӧм нэм,
И ме вӧзъя ог нин ӧтчыд:
Муслун,
Коді миын эм,
Мед и кар сертиыс тӧдчис:

Визин улич,
«Абъячой» —
Ветлысь-мунысьяслӧн керка.
Изьва площадь...
Лун кӧть вой
Кыпыд сылӧн паськыд веркӧс.

Кыптӧ-вӧччӧ
Сыктывкар,
Выль фонтан со ёрӧ синтӧ,
Гӧгӧр лампа —
Югыд дзар,
А фонтанлӧн нимыс —
«Синдор».

Воссис карын
Сёянін,
Мича коми ань сэн пусьӧ.
Лыддя ылісянь:
«Емдін» —
Тадзи сёяніныс шусьӧ.

Изкар...
Вӧвлі кар кӧть эз,
Нимыс овны кутас — эска.
Выль стрӧйбаяс —
Кыдзкар грезд —
Карын медся гажа места.

Со и шмонитыштім, вок,
Со и сёрнинымлы помыс:
Карлы —
Кыксё сайӧ во!
Но а сійӧ — быдмӧ, томмӧ.

Муса тэд
И муса мем,
Весиг йӧз муын нин тӧдса.
Сӧмын сиӧм
Менам эм:
Эз мед вошты ассьыс рӧдсӧ.