* * *

Унаӧн лэбачьяс пиысь, кодъяс тӧв кежлӧ
воӧны шоныд саридз дорӧ, сэні оз сьывны.

Висьтав, мыйла, муса колип,
Саридз дорын тэ он сьыв?
Кӧдзыд Войвыв ылӧ коли,
Гӧгӧр радлӧ ывла выв.

Ставыс сьылӧ, быдмӧ, олӧ,
Ышмӧ гажаинас лов...
Али яналӧмысь полан?
Али гӧлӧсыд эз ло?

Меным вочавидзӧ колип:
Эз на гӧлӧсторӧй быр.
Муса Войвыв ылӧ коли,
Сійӧс казьтыла ме пыр.

Тані метӧг уна сьылысь,
Мен жӧ колӧ парма-вӧр,
Сэтчӧ, муртса лымйыс сылас,
Воа сьылігтырйи бӧр.