ТӦЛЫН


Олан-вылан, мича тӧв!
Кутшӧм еджыд, небыд лым,
Сӧмын доддьӧ ӧні сӧв,
Чойсянь нӧбӧдас бус-тшын!

Колим гожӧм, колим ар,
Сьӧкыд вӧлі помтӧм удж.
Мый нӧ шоныдысь, мый жар,
Оз кӧ сёйны няньыд судз?

Кӧть и кӧдзыд, йирмӧг, лёк,
Паччӧр шонтас кыкнан бок,
Кӧдзыд миян воча вок.
Сэк пес, турун — сӧмын шог,

Ӧні бара оз босьт тшыг!
Гӧгӧр пызан вылын нянь,
Ӧні ставыс миян чиг:
Рок ни рок да пань ни пань!

Дышлы ӧні — сӧмын узь,
Нинӧм тэрмасьны: сой кык!
Югдан вежӧс бура кузь,
Зільӧс кӧдзыдӧн он пык.

Сӧмын велӧдчысьлы шог:
Рытын лыддьы, асыв гиж,
Быдӧн тӧдны сылы мог,
Кутшӧм шонді, мый-я виж...

Мед! И сылы колӧ тӧв,
Шоныд коркӧ воссяс лун,
Не миянлы лоӧ пӧв!
Сылы вемӧс, миян ун...