ПӦРЪЯСЯН ЛУН


Апрель ӧтиӧд лунӧ
Лёшӧ пальӧдіс ун.
Кӧть и узис, эз вунӧд —
Талун пӧръясян лун.

Книга портфельӧ сюйис,
Мӧдіс школаӧ пи.
Анна тьӧткаӧс суис,
Вывлань лэптыштліс ки:

— Тіян керкасьыд петӧ
Ӧшинь пырыс лӧз тшын.
Тьӧтӧ шемӧсмис сэтӧн.
Сувтіс сыв нисьӧ кын.

Но и серамыс пилӧн:
— Талун пӧръясян лун!
Аттӧ нимкодьыс сылӧн
Чужӧм пасьтала нюм.

Мунӧ, быттьӧкӧ бордъя,
Сувтліс гӧп дорӧ здук.
Вӧлі ва гӧпсӧ ордйӧ,
Кодкӧ горӧдіс друг:
— Виччысь, машина дінад!
Лёшӧ ва гӧптас — шмот.
Повзис, оз ӧшйы инас,
Муртса сьӧлӧм оз пот.

Пыр жӧ видзӧдліс бӧрӧ,
Но машина эз вӧв.
Сӧмын Коля сэн дзӧрӧ,
Киас бергӧдлӧ кӧв.

Вак-вак серӧктіс сійӧ:
— Талун пӧръясян лун!
Радыс оз тӧр ку пиас,
Чужӧм пасьтала нюм.

— Аддзин шмонитны кӧні! —
Дӧзмис Лёшӧыд сэн. —
Мун вот школаад ӧні,
Лоӧ косьтысьны мен!