ИЮНЬ 29ʼ ЛУН ДІНӦ КЫВ


О, чужан лун! Ло ньӧжмыдджыкӧн туйын.
Тэ кымын тэрыб, сьӧлӧм сымын нор.
Кыдз тувсов Эжва — сы моз кӧсъя туны
И паськыдджыка шевкнитлыны борд.

Мед рӧднӧй мулысь сьӧлӧм тіпкӧм кылі
И олӧм гысьыс бӧрӧ ме эг коль.
Мед вӧр-ваыскӧд ӧти хорын сьылі
Да менсьым гӧлӧс кыліс яг и ёль.

О, чужан лун! Тэ туйын сувтовкерлы,
Со мыйта дзоридз — манитчышт вай сэн.
Ӧд арлыд пиам вель нин пыдӧ келі,
А пӧрысьлуныс оз ков мен ни тэн.

А мыйӧн восьтан менсьым керка ӧдзӧс,
Мен медся дона козинсӧ тэ сет —
Содз тырнад мыччы енэжлысь лӧз сӧдзсӧ
Да Эжва бокса дзоридзысь букет.

Вӧч сідз, мед кыліс йӧзлӧн шуда серам,
Эз куслы мед на сьӧлӧмысь любов,
Эз тыртӧммыв мед кага чужтан керка,
А сэсся ловлы унджыкыс оз ков.