ВОДЗӦ КЕЖЛӦ


Ок-ок-ок! Коркӧ кулан кад воас...
Дзормӧ юрси — нач пужъялӧ сад.
Он и тӧдлы, кыдз лэбасны вояс,
Локтас тӧдлытӧг син кунян кад.

Мыськӧй Джеджимъю ваӧн кор кула,
Чужтӧм кӧйдыс кодь медым эг ло.
Мича веж лудсӧ вольсалӧй улам,
Мӧдар югыдас радліс мед лов.

Ловъя дзоридзӧн шебрӧдӧй менӧ,
Чӧскыд дукъяссӧ исалі мед.
Сьылӧй молитва, тшӧктӧ кыдз Енмыс,
Вӧчӧй Ен нога лӧсьыдик крест.

Кора сюйыштны юр улӧ кодзув,
Медым югзьӧдіс мен ывла сер.
Шонді югӧрсӧ койыштӧй соддзӧн,
Кулӧм сьӧлӧмӧй эз ло мед нэр.

Дзебӧй Джеджимӧ, суас кор рӧкыс,
Джуджыд нӧрысын шойнаыс сэн.
Прӧстит, ёрт, тэнад петліс кӧ лӧгыд,
А став грексьыс мед прӧститас Ен.

Талун сьӧлӧмӧн ог на ме усь:
Водзын олӧмӧй ой-ёй на кузь.