* * *

Менам сьӧлӧмӧ поздысис гожӧм —
Шонді югӧркӧд локтіс июнь.
Нӧшта збодермис гӧрд гача пожӧм,
Орччӧн кыдз пу — веж бордъяса лунь.

Муса гозъя моз олӧны найӧ...
Найӧс войнаӧдз «гӧтравліс» бать —
Гажа ягысь том пуяссӧ вайліс,
Ӧшинь улын мед паськаліс сад.

Со и чужӧны налӧн выль вожъяс,
Кыдзи челядьӧс чужтӧ шань мам.
Пожӧм — чутласьысь уска и тошка,
Кыдз пу сы дінын — мелі да рам.

Налысь быдмӧмсӧ батьӧ эз тӧдлы, —
Сытӧг исковтіс уна сюрс лун,
Сытӧг локтіс со тэрмасьысь ӧдӧн
Кымын пӧрйӧ нин гажа июнь.

На кодь мичаыс пармаын эм-ӧ? —
Пожӧм-кыддзыс ӧд батьӧлӧн пас.
Весиг пуяслӧн вуджӧрыс меным
Бать кодь муса, и дона, и ас.