* * *

Кывйыс —
Шонді югӧр,
Нэмъяс пыр писькӧдчысь.

Асъя шонді югӧрыс то
Пызан шӧрын ворсӧ —
Ловъя лов.
Сералӧ-вералӧ.

И ме киӧс матыста сыланьӧ,
Би дорӧ моз —
Шонтыштны.

Кыла,
Кыдзи шоныдыс меӧ йиджӧ,
Морӧс пытшкӧсӧс гӧгӧртӧ —
Личӧдчывны корсьӧ аслыс потан.
Да сьӧлӧм бердӧ сэсся ляскысьӧ.

Сьӧлӧм тіпкӧмӧс
Кывзас
Мый дыра...

И менам лов шыӧн велалас овны.

Но сэтшӧма сэсся гажтӧмтчас
Лун югыдсьыс
Да бӧр
Вӧзйысяс ортсӧ.

И ме сэки пукся аслам пельӧсӧ
Да сы йылысь мӧвпалӧмӧн
Гижа.
Гижӧдас и вуджӧ сылӧн лолыс.
А сьӧлӧм тіпкӧмсӧ ӧд ӧктӧма менсьым
Дай тӧвру-мӧвпъясӧс кутӧма.

Пызан вылын кабалатор,
А сэні бара шонді югӧр —
Ловъя лов.
Сералӧ-вералӧ.

И синтӧ чуксалӧ...
И ловтӧ...

Лыддьыны.

И ме выльысь и выльысь
Босьтла
Шонді югӧрсӧ киӧ...