МЕД ЕНЭЖЫС ВӦЛІ ВЕК ЛӦЗ

Кор кусіс войнаыс,
			и радлісны ставыс,
Сэк ыджыд мам бӧрдіс
			и бӧрдіс тшӧтш пӧч.
Морт пиянӧн воштісны
			Устинь да Парась,
Но синванад ӧні
			он нинӧм нин вӧч.
Карелия фронт вылын
			Ёгор дядь усис,
А Ӧльӧксей дядь —
			Ленинград дорын дзик.
А батьӧлӧн фронт туйыс
			вӧлі зэв кузьӧн...
Но век жӧ салдатӧс
			со виччысис сикт.
И воис салдат,
			вайис ранаяс, дойяс.
И мамӧлы козьналіс
			медбӧръя ныв.
Эз кыпӧдны керъястӧ
			сылӧн нин сойяс.
И кадысь водз эновтны
			ковмис му выв.
Мам сой вылӧ челядь ми
			куимӧн колим.
Кык пӧрысь на нӧшта
			да важ керкашой,
Но кутчысим олӧмас,
			ӧтсӧглас олім.
И юким быд сьӧлӧмӧ
			ӧтмоза дой.
И ыджыд-ӧ вежӧр на
			вӧлі сэк менам —
Ме мамӧс рытйысьны,
			бӧрді, эг лэдз...
А сійӧ ӧд сэки
			ме арлыда вӧлі.
И ме вӧсна, гашкӧ,
			выль семья эз тэч?
Бур кӧсйӧмъяс, радлун
			Победаыс чужтіс.
Эз вӧв кӧ Победаыс,
			вӧлім-ӧ ми?
Пеж Гитлерыс мунымӧс
			дзикӧдз эз южды
Мед некор войнаыслӧн
			эз ӧзйы би!
Мед Му вылас некӧн
			эз лыйсьыны эськӧ,
И ӧтсӧглас олісны
			быд пӧлӧс йӧз.
Морт, олӧмлань вежӧртӧ
			сӧмын тэ веськӧд.
Мед енэжыс Му весьтас
			вӧлі век лӧз!