КАССЯНА ВО

Зина Кармановалӧн югыд паметьлы        

Некыдзи оз помась
Тайӧ воыс.
Мыйта вайис
Сійӧ йӧзлы дой.
Неминуча
Бара на со лоис,
Сё морт гӧгӧр
Пасьмунісны!.. Ой!..
Самолёт эз пуксьы,
Мыйла сылӧн
Йӧзӧс вайны
Эбӧсыс эз ло!
Вочавидзӧм
Ӧткодьӧс пыр кылан.
Тайӧ сійӧн,
Кассяна пӧ во.
И войнаыс
Му вылын оз помась,
Ӧта-мӧдсӧ
Виалӧны йӧз.
А салдатъяс
Сэтшӧминик томӧсь...
Оз нин тыдав налы
Енэж лӧз.
Весиг вӧрыс-ваыс
Мӧд ног олӧ:
Кынтӧ пуктас,
Кӧдзыдалӧ пыр,
Няня муяс косьтӧ.
Кассян волӧн
Лёк поводдя
Чукӧртӧма тыр.
Тшак-вотӧслӧн
Таво гежӧд серыс.
Парма вӧрным
Сетыштӧма чӧд.
Быттьӧ Енмыс
Нарошнӧ сідз керис,
Гашкӧ, сійӧн, —
Рӧмыс сылӧн сьӧд.
Гожӧмыс эз вӧв
И арыс бара
Повзьӧдчӧ,
И виччысям со тӧв.
Воас сійӧ сиктъясӧ
И карӧ.
Сьӧлӧм дойӧй
Некыдзи оз чӧв...
Лёк во нуис авъя
Коми аньӧс.
Прӧстит, Зина,
Тӧдмалі ме сёр.
Овлім тэкӧд
Ӧти солӧн-няньӧн
Карад сэки,
Велӧдчимӧй кор.
Кӧвъясьӧм пӧ тэныд
Сьӧкыд висьӧм.
Кодӧс лӧньӧднысӧ
Абу вын?..
Бурдӧдны ни вердны —
Ставыс киссьӧм.
Чина йӧзлӧн
Сьӧлӧм йи кодь кын.
Нёль дас арнад
Кольны вӧльнӧй светсӧ
Кодлы абу
Сьӧлӧм дойӧдз жаль.
Олӧмыс мӧй
Та мында и сетсьӧ?!
Дыр-ӧ сійӧ
Менӧ тшӧтш оз таль?