МУЗА


Тэ, чужан сиктӧй — менам ловъя муза,
Сӧдз Джеджимъю и кывтыдпомса рас.
Став Аннаыс и Марьяыс тан муса,
Став Иваныс и Ёгорыс мен ас.

Со, Емель Павел «Жигулисӧ» мыськӧ,
Со, коса-гӧрбуш лэчтӧ Ёгор Миш,
Со, Виктор тьӧзӧ ломтӧма выль пывсян,
Мен чигъя чери вайӧ Евгень Гриш.

Важ ичӧт сиктӧй ассьыс олӧм олӧ,
Мӧс жыннян шыӧн ойдӧ рытъядор.
И нимкодьлунӧн тырлӧ сыысь лолӧй,
Мый эз на кус тан челядь дзользян гор.

Весьт кузя сиктӧй сирзьӧм пу кодь винёв,
Тан пӧшти ставлӧн мелӧн кодь жӧ ов.
Тэ талун кӧні, Дзӧля Ӧндрӧй Лина —
Кӧн дас арӧса медводдза любов?

Став бурсӧ тэныд, чужан сиктӧй, кевма,
Ме карсянь аддза тэнсьыд чужӧмбан.
Тэ, чужан сиктӧй — помавтӧм поэма,
Тэ, чужан сиктӧй — гижтӧм на роман.