ЧУКЫЛЬ-МУКЫЛЬ УНА ТӦДӦ

Ытшкӧм видз
Да кывтысь юыс
Сёрнитӧны
Татшӧм нога:
«Чукыль-мукыль,
Кытчӧ ветлін?»
«Шырӧм-бритӧм,
Мый тэн могыс?»

«Уна сикт да
Каръяс дорті
Чукльӧдлӧмӧн ӧд
Тэ кывтан.
Парма бокӧд,
Діяс костті,
Ойдлӧм ольяс
Морӧс вывті.

Майбыр, тэныд
Туйыс восьса.
Он и сувтлы,
Век тэ мунан.
Уна аддзылан
И кывлан.
Тэ ӧд тӧдан
Меысь уна.

Ме моз, юӧй,
Нэмъяс кежлӧ
Ӧти местаӧ
Эн сибды.
Висьталышт вай,
Кыдз нин олӧм
Мунӧ каръясын
Да сиктын».

«Кыдз и вӧвлі
Нэмъяс чӧжӧн —
Зільлӧн сиктын
Ставыс эм на.
Кыптӧ керка,
Кыптӧ карта.
Ачыс вӧчӧ,
Оз кор Енлысь.

Дышлӧн тшыгла
Гачыс усьӧ.
Пескыс абу,
Вевтыс розя.
Виддзыд-муыд
Ӧні тырмӧ.
Дзоньвидза кӧ,
Овны позьӧ.

Кодлӧн эскӧмыс
Нин абу,
Ачыс асьсӧ
Сюйӧ гуӧ.
Некодкӧд кӧ
Юкны шогсӧ,
Мӧдар югыдас
И нуӧ.

Кодкӧ
Гусясьӧмӧн олӧ.
Гажа юрӧн
Мӧдӧс виӧ.
Ӧні мортлӧн
Мортыд вылӧ
Кокньыда зэв
Лыбӧ киыс.

Татшӧм сяма
Олӧм-вылӧм
Вӧтасьны ми
Эгӧ кужлӧй.
Мыйта мортӧс
Пеж винаыс
Шойнаягӧ
Томӧн чужйӧ.

Ыджыд гусясьысь
Жӧ некор
Абу мыжа,
Важ моз чина.
Сы пуд кодкӧ
Пасьтӧм, кӧмтӧм,
Бӧръя грӧш вылас
На вина...

Курас-карас
Вылас босьтас,
Ловсӧ кыпӧдлантор
Ньӧбас.
Юыштлас да
Сӧмын сэки
Вунӧдлас, мый
Колис дьӧбӧ».

Ытшкӧм видзлы
Кывтысь юыс
Висьтасис со
Татшӧм нога.
Чукыль-мукыль
Уна тӧдӧ.
Шырӧм-бритӧм
Кывзӧ шога.