КУТШӦМ ГӦСТЬ, СЭТШӦМ И ПАНЫДАЛӦМ

Сикт помын вӧліс ичӧт керка,
Ариец пырис сэтчӧ, Курт.
Но аддзис шензьӧдана серпас, — 
Со водзын весиг морт эз сувт.
Эз сувт, эз чолӧмав, кыдз колӧ,
Эз ыдждӧдлы, эз копыр вӧч,
Эз паныдав пӧсь няньӧн-солӧн,
Эз шу: «Вай прӧйдит, пуксьы, гӧсть».
Курт муніс Франция и Польша,
Сэн сылы вӧчлісны почёт.
А тані, рочын, быттьӧ пон шой,
И скӧрмӧмысла тшук эз пот.
— Кор пырӧ немец, — шуис сійӧ, — 
То сувтны колӧ пырысь-пыр
Да паныдавны тыра киӧн,
Горилка вайны ведра тыр.
А тайӧс вӧчны код оз кӧсйы
Да коді кывзысьны оз мӧд,
Ми рель йылӧ дзик ставсӧ ӧшлам,
Мед му вылӧ эз коль пеж рӧд! — 
— Прӧститӧй, — шуис пӧль. — Эг кужӧй:
Ми — пемыд, велӧдчытӧм йӧз.
Ми тшына керкаясын чужим,
Кӧн прамӧй йӧз оз видзны мӧс.
Но гӧстьӧс примитны ми дасьӧсь,
Пӧжалуйста, век шуам, лок...
Эй, Анна, петав мун да татчӧ
Вай гӧстьыслы тэ вина штоп.
Вай салӧ тшӧтш и вӧч глазунья,
Мед сёйӧ, лоӧ пӧт и код.
Ме ачым вӧвлывлі Берлинын,
Зэв лӧсьыд олӧ сэн народ...
— Берлинын? — шыасис ариец. — 
О, гут, зэр гут! О, отшень гут!.. — 
Тан вичмис кад, и пӧльлӧн киыс.
Ариец мышкӧ затшкис пурт.