ВАСАВИДЗЫН

Васавидз! Тат визывтлӧма Емва,
Ӧні — муяс. Мунам сэті ми.
Важсӧ казьта — сьӧлӧм пиын емъяс,
Яйын йирмӧг, моллясьӧ сэн йи.

Ӧні татӧн вына трактор гӧрӧ,
Мургӧ сійӧ, радлӧ тракторист.
И вот коркӧ ветліс тайӧ йӧрӧд
Мамлӧн гӧр, пу гӧр, код тӧр и сісь.

Вӧлыс — чань. Оз кывзысь сійӧ некыдз,
Муыс — косьмӧм сёй, и вот пу гӧр
(Ӧдва аслас домӧдъясӧ ӧшйысь)
Некыдзи оз вермы гӧрны йӧр.

— Воронко, тэ кывзысь: няньтӧг колям.
Кыдз нӧ сытӧг? Гымалӧ война... — 
Воронко-ӧ тӧдӧ «кывзысь» дольӧм?
Сылы колӧ турун, зӧр да ва.

Ваыс, гашкӧ, юнысӧ и тырмис, — 
Юӧмӧн эз косьмыв Емва ю.
А вот зӧр да турун... Казьтіг сырмис
Емваын быд морт и кыв эз шу.

Кытысь найӧ? Вынаыс да томыс
Еджыдъяскӧд нуӧдісны тыш.
Овмӧс кутіс сійӧ, коді ёмӧм
Да зэв важӧн гӧрбыльтӧма мыш.

Катласны кӧть найӧ Емва йылӧ,
Уна-ӧ нӧ вӧчас налӧн ки?
Уджыс пыксьӧ нывбабаяс вылӧ,
Вынныс налӧн... Асьныд тӧдад ті.

Вӧв оз кыскы, а ӧд гӧрны колӧ,
Кад оз виччысь, сылӧн аслас сям.
Лолалӧ сэн мамӧй ыджыд лолӧн,
Син доръяссьыс синваыс оз ям.

Казьта тайӧ кадсӧ — лолӧй тырлӧ,
Сынӧдыс оз тырмы некыдз мем.
Тайӧ кадыс сьӧлӧм менсьым кырлӧ,
Но он вуштышт: вӧліс сэтшӧм нэм.

Ӧні бать-мам абуӧсь нин важӧн, — 
Виисны водз найӧс тыш да удж.
Сэки уджныс найӧс кӧть эз гажӧд,
Югыд ордым вомӧн эз жӧ вудж.

Васавидзын талун гӧрӧ трактор,
Ньӧти бор сэн — ставыс ӧти йӧр.
Олӧм мунӧ сійӧ долыд трактӧд,
Кодӧс восьтіс бать-мамлӧн пу гӧр!