ЕДЖЫД ЛЬӦМ РОЗ

Гӧра дорӧ,
Кӧні шувгӧ джуджыд коз,
Рытын сёрӧн
Мен тэ вайин льӧмлысь роз.
Еджыд льӧмлысь,
Кысянь ӧвтӧ чӧскыд дук.
Ме ог вунӧд — 
Му и сынӧд — 
Ставыс вежсис тайӧ здук.

Эжва сайӧ
Чӧвті синмӧс — ловзис вӧр.
Мый нӧ тайӧ?
Мичыс ывлаас оз тӧр.
Быттьӧ ӧгыр,
Ӧзйӧ кыа — веськыд би.
Видзнас-эжнас
Сотчӧ Эжва,
Радӧсь — сулалам сэн ми.

Тэ мен шуан:
«Менам дона сьӧлӧмшӧр,
Коми муын
Тэтӧг гажтӧмсьӧ мен вӧр...»
А ме кывза — 
Тэныд нинӧмтор ог шу.
Мый ме шуа?
Мый ме шуа,
Кодыр гӧгӧр аддза шуд?

Гӧра дорӧ,
Кӧні шувгӧ джуджыд коз,
Рытын сёрӧн
Мен тэ вайин льӧмлысь роз.
Еджыд льӧмлысь,
Кысянь ӧвтӧ чӧскыд дук.
Ме ог вунӧд — 
Му и сынӧд — 
Ставыс вежсис тайӧ здук!