СЬЫЛӦЙ, ВОКЪЯС!

Владимир Поповлы,
Альберт Ванеевлы

Изьва йылысь сьылӧ Володь,
Альберт — Мозын йылысь.
Кывза — сьӧлӧм вылын долыд,
Томмыла сэк. Збыльысь.
Томмыла, мый муным мича,
И бур йӧз сэн олӧ.
На вылӧ кӧть нэмтӧ видзӧд,
Нэмтӧ радлас лолыд.
Мед зіль удж да йӧзлӧн дружба
Пемдылӧм оз тӧдны!
Мича нэмӧ туй ми юждам,
Медым шог не тӧдны.
Кодлы шогыс, кодлы колӧ?
Панявлім нин сійӧс.
Мед и долыд сэсся олӧ,
Вӧрсалы шог сиӧс!
Сьылӧй, вокъяс, кыпыд горӧн,
Гажӧн кышӧй мусӧ,
Медым рытын потшӧс дорын
Сьылӧм эз тӧд кусӧм!
Мед том гӧлӧсӧн став мирас
Муным миян сьыліс
И эз тӧдлыв шыыс чирӧм,
Нэмъяс чӧж мед кыліс!