ТОМ КАД ДЫРСЯ


Гӧгрӧс чужӧмнас,
Мича вир-яйнас,
Лӧсьыд тушанас,
Гартчӧм юрсинас

Менсьым сьӧлӧмӧс
Том ныв ылӧдіс,
Менсьым гажлунӧс
Дзикӧдз бырӧдіс.

Ӧтчыд ковмывліс
Син пыр нуӧдны.
Эг кут вермыны
Сійӧс вунӧдны.

Эськӧ лысьта кӧ —
Сійӧс тӧдмала.
Ассьым радейтӧм
Сылы висьтала.

Сійӧ кывзас кӧ
Сэтшӧм сёрнитӧм,
Оз кӧ серавлы
Менсьым радейтӧм, —

Эськӧ ёна жӧ
Нылӧс дзигӧдла,
Сьӧлӧм бердӧдзым
Дзикӧдз топӧдла.

Ичӧт вомдорсӧ
Сылысь окала...
Сӧмын сёрнитныс
Ог куж кыдз колӧ.

Нылысь яндыся,
Ог лысьт тӧдмасьны...
Кысь нин ме кодьлы
Нывкӧд окасьны...