ВОЙЫН


Гӧрд шонді вӧр сайӧ быгыльтчис важӧн.
Енэжлӧн эшкыныс ӧшалӧ сьӧд.
Парма весьт тыр тӧлысь жугыль и гажа...
Майбыръяс, кодъяслы нюмъялӧ вӧт!

Узьӧны бадь пуяс ю мӧдлапӧлын.
Ыліын сьӧдалӧ сьӧд парма вӧр.
Мыйлакӧ жугыля тіпкӧ пӧсь сьӧлӧм:
Здук кежлӧ нюммунлас, жугыльтчас бӧр.

Кыр йылын шувмуні туганнас пожӧм.
Бура тэд, вокиньӧй, рытйыны рыт!
Му вылын ытшкандыр, му вылын гожӧм...
Енэжын кодзувъяс... Ог тӧдӧй лыд!

Чӧскыда узьӧны му вылын пиян.
Узьӧй жӧ, вӧталӧй гажаджык вӧт!
Вӧлӧсьтын... Му вылын ӧтнам ме биа.
Оз узьсьы... Юр вемӧй гудыр и сьӧд...

Кӧні эм вежатор, донатор, муса,
Локтӧй жӧ, тыртӧй жӧ сьӧлӧм и юр!
Дзузалан лампаӧй менам сэк кусас,
Шлывгас вӧт ме ордӧ уна и бур.

Полігтыр нюммуніс асывлӧн кыа.
Лапнитіс ыджыд сьӧд синъяснас вой.
Бадь костті тыдовтчис кельыд лӧз лыа.
Кӧн нӧ тэ, сӧдз мӧвпӧй — сё муса чой?..