ДАДДЬӦН ДЖУДЖЫД ЧОЙТІ


Даддьӧн джуджыд чойті
Исковті ме шыльк,
А туй вылас сэтӧн
Вӧлӧма кӧ мыльк.

Чеччыштіс тай даддьӧй
Енэжӧдзыс нач,
Менӧ сэсянь чӧвтіс
Мышку вылам швач.

Ачыс меысь пышйис
Дай лым пиӧ сатш;
Видзӧда да куйлӧ —
Чергӧдчӧма гатш.

Кыски даддьӧс сэтысь,
Кок тыр пырис лым.
Турдӧ менам киӧй.
Чужӧм би кодь пым.

Тадзи джуджыд чойті
Ислала ме дыр,
Кытчӧдз мам оз горӧд:
«Пиук, гортӧ пыр!»

Гортӧ воа. Ӧдйӧ
Кая кильчӧ пос.
Кокӧн лымсӧ пырта —
Дыш босьтлыны рос.

Кывтын менам батьӧ
Доддьӧ пуктӧ кӧрт,
Пеша дорын чойӧй
Швыргӧ-печкӧ шӧрт.

Мамӧ путшкӧ сунис —
Чӧрсыс сылӧн яр,
Швыркакылӧ ворсӧ.
Шӧртыс лоас гар!

Кая паччӧр вылӧ
Шонтыны ки-кок.
Пӧльӧ мыйкӧ мойдӧ...
Сэні ичӧт вок.

Дедӧ мойдӧ помтӧг,
Кыдзи овліс сар,
Кыдзи ӧтчыд гундыр
Босьтліс сылысь кар.

Кузя мойдӧ сійӧ —
Сылӧн нем оз вун...
Вокӧй важӧн узьӧ,
Менӧ босьтӧ ун.

Дедӧ век на мойдӧ,
Менам куньсьӧ син,
Мошкоритча-корся
Аслым воданін.

Ывла вылын пемыд.
Лыйсьӧ пашляк сэн...
Увгӧ нора тӧлыс...
Пола, гажтӧм мен.

Керка пытшкын быдӧн
Ланьтӧмаӧсь чӧв;
Ун йылысь моз кыла:
Шутёвтлывлӧ тӧв.