УДЖ ДЫРЙИ
(Серпастор)


	Жыннянъяс ковгӧны,
	Брунгӧны, брангӧны:
Пурисьті руньгӧны-кайӧны мӧсъяс.
	Бӧрсяньыс челядьлӧн
	Тільскӧны гӧлӧсъяс.
Триньгӧны, троньгӧны сӧдз ёль ва шыяс:
	«Ти-ла-ла, та-ла-ла, та-ла-ла», —
	Шыасьӧ йӧлӧга варова.
	Горӧдчы, йӧлаӧй, Коми му кузяла;
	Горӧдчы сэтчӧ тшӧтш, кытӧні узьӧны.

	Ва вывті пыжаяс
	Шуньгӧны-чилӧны:
Пульскӧдчӧ-польскӧдчӧ, чужъясьӧ пелыс, 
	Лювзыштӧ, лявзыштӧ,
	Кливзыштӧ сынантув.
Мургӧны, юргӧны ва вылын шыяс.
	«Ти-ра-ра, та-ра-ра, та-ра-ра», —
	Шыасьӧ йӧлӧга варова.
	Горӧдчы, йӧлаӧй, Коми му кузяла;
	Горӧдчы сэтчӧ тшӧтш, кытӧні узьӧны.

	Медбӧръя югӧрнас
	Шондіыс ва вылас
Чивкъялӧ-чеччалӧ, шпыннялӧ-йӧктӧ.
	Мӧдлапӧв гид дорын
	Том ичмонь сёрмӧма:
— Вуджӧдӧй! — горӧдӧм пармасӧ вундӧ.
	«Ти-ла-ла, та-ла-ла, та-ла-ла», —
	Йӧлӧга юргӧм шы кылӧ на.
	Юркнитлы, йӧлаӧй, Коми му кузяла!
	Юркнитлы сэтчӧ тшӧтш, кытӧні узьӧны!