ЭНӦ СЬЫЛӦЙ!


Асывводзын керӧс йылын
Эжва дорын шонді петіг
		Энӧ сьылӧй.
	Сэки гажа сідзи,
	Гажсӧ сійӧс видзӧй.
Еджыд ягын, лыа вылын,
Чӧскыд дука пожӧм вӧрын
		Энӧ сьылӧй.
	Сэки сідзи долыд,
	Кокни ветлӧ лолыд.
Кыркӧтш дорын веж луд вылын,
Бобув, чиркъяс, дзоридз пӧвстын
		Энӧ сьылӧй.
	Турун пиын кылӧ
	Сэки чирклӧн сьылӧм.
Пемыд арын шувгысь вой тӧв,
Йизьӧдны кор кӧсйӧ сьӧлӧм,
		Сэки сьылӧй!
	Сьылӧй, зонъяс, нывъяс,
	Гажа сьыланкывъяс.
Кӧні шогсьӧм, бӧрдӧм кылӧ,
Коньӧр мортӧс притча суӧм,
		Сэні сьылӧй.
	Сьылӧй лӧсьыд сьылӧм,
	Медым гажмас сьӧлӧм.