* * *

Увгысь ывла вылысь пыри гортӧ,
Уси тӧд вылӧ мем ёртӧй.
	Сійӧ вунӧма...
	Ылӧ мунӧма.
Пыри мӧвпъясӧн ме сьӧлӧм пиӧ —
Ломтысьӧ-ӧ том кад биӧй?
	Шӧрас, сьӧлӧмас,
	Ӧгыр вӧлӧма!
Идзас, гӧрд лыс лапъяс, сюмӧд пырта,
Чӧскыд ниа сирӧн тырта
	Сьӧлӧм гӧгӧрӧс —
	Песта ӧгырӧс.
Ассьым сьӧлӧмӧс ме песта сійӧн:
Ломтысяс мед гажа биӧн —
	Югыд лолас мед
	Менам оласног!
Паськыд ва дор нӧрыс йылӧ лэчча,
Сьӧлӧм бисӧ нуа сэтчӧ —
	Гажа ва дорӧ,
	Тувсов ва дорӧ...
Ваймас. Кольӧ пӧим югыд биысь —
Паськыд ваӧ тӧвзяс сійӧ.
	Тӧв ныр петлывлӧ,
	Гыяс ветлӧны.