ГЫА ЭЖВАЭжва шуньгӧ сӧстӧм ванас. Вой тӧв пӧльтӧ ем кодь ёсь. Эжва гыыс сувтӧ паныд, Пансьӧ чорыд-чорыд кось. Сизим арӧс меным вӧлі, Мекӧд дас арӧса вок. Пыжӧ бӧжавны ме сӧлі... Пола — тірзьӧ ки и кок. Со и петім Эжва шӧрӧ. Сьӧлӧм ыркйӧ, киӧй дзӧрӧ: Гыыс ызгӧ, гыыс лёк... Мунам видз вылӧ кык вок. Со тай мӧвкнитыштіс гыыс, Кайліс гы мыш вылӧ пыж. Повзи Эжва бузгӧм шыысь — Пыж дорӧ кабырті гыж. Лопта пелыс лэдзи киысь, Пола — мед эськӧ ог вӧй. Вокӧй лёкысь видчӧ сійӧ: «Босьт пелыстӧ!.. Бӧжав, йӧй!» Менам ыркмунлывлӧ сьӧлӧм... Кыдзкӧ вуджим мӧдлапӧлӧ... Тадзи тӧді Эжва шӧр, Гылысь первой курыд кӧр. Гыа ватӧ тэнсьыд вуджлі Аслам нэмӧн уна пӧв. Кӧть и бӧжавны ме кужлі, Лючки быдысьӧн эз вӧв. Эз на вун со: вӧлі сідзи — Мӧдлапӧлын лысьтім мӧс. Локтам гортӧ, пыжным ичӧт. Берег дорын ойзӧ йӧз. Ваыс еджыд быгъя гыа, Бузгӧ — оз кыв сёрни шыыд. Ныртӧ вундӧ лэчыд тӧв. Полам... быть тэ пыжад сӧв. — Мӧдлапӧлад ӧмӧй узян, Челядь ставныслӧн ӧд тшыг, Да и йӧв туисыд шузяс — Кодлӧн ӧти, кодлӧн кык. Ӧти пыжӧ квайтӧн сӧлім, Пыжыс ичӧт, быттьӧ вор. Бӧжалысьыс сюсь зэв вӧлі: Аддзылӧма унатор! Кодыр Эжва шӧрӧ воим, Гыыс пыж тыр васӧ койис. Войтыр повзис — сынисадь. Но эз повзьы Семен дядь. Бузгис ӧдйӧн йӧвсӧ юӧ, Пыжысь васӧ койӧ Сем, «Ставныд вӧчӧй тадзи! — шуӧ — Он босьт тіралӧмнад нем!» Нывбабаяс тірзян кинас Ваӧ кисьталісны йӧв (Ваад йӧлыд уна инас!), Уджалӧны шы ни тӧв. Регыд пыжыд рекмис ваысь, Ошкис Семен найӧс таысь. Нимкодь вӧлі, аддзис кор Кокным ас береглысь дор.
