ИДӦРТӦМ СИДӦР


Ваньлӧн быдмӧ питор —
Квайт арӧса Сидӧр.
Сэтшӧм вильыш, кыв оз тӧр,
Кытчӧдз он босьт ньӧр.
Мамыс шуас: «Сидӧр, мыссьы!»
Сидӧр пызан улӧ кыссьӧ.

Мамыс шуас: «Эн тэ гыжъясь!»
Сидӧр ывла вылӧ пышъяс.
Сэсся ветлас кузь лунтыр.
Локтас гортас — сирӧд мыр.
Кысь мый сюрӧ сёяс-сӧвтас,
Паськӧм кытчӧсюрӧ чӧвтас,
Коксьыс кӧмкот чужъяс ылӧ —
Пӧлать вомӧн паччӧр вылӧ!

Водас лабич дорӧ,
Узьӧ сэн ныргорӧн.
Чеччас асыв. Синсӧ тільӧ:
Быттьӧ мыссьыны со зільӧ,
Мыссян дозлань тувччӧ,
Мыссян дозйыс увтчӧ:
«Ог ме мыссьӧд коз пу мырйӧс!
Кисьыд няйттӧ зырт тэ зырйӧн,
Сэсся вӧлись татчӧ лок...
Видзӧдны тэ вылӧ шог!»

Кӧрт зыр кӧсйӧ босьтны пиыд,
Кисӧ нюжӧдӧ нин сійӧ...
«Войдӧр чукӧрт дӧрӧм-гачтӧ,
Дзоргышт рӧмпӧштан пыр асьтӧ!»
Чеччис Сидӧр скач,
Корсьӧ дӧрӧм-гач.
Дӧрӧм-гачыс сыысь
Пышйӧ, быттьӧ гыысь.
Паськӧм эльтчӧ, видӧ:
«Идӧртӧм тэ, Сидӧр!
Мышкыд саӧсь, водзыд сёйӧсь...
Ветлан дзик жӧ нин тэ сёйысь!
Но и, но и олӧм!
Ой, ми тэысь полам!»

Петіс ӧшинь улӧ пи...
А сэтӧні чушканзі!
Лэбзьӧ Сидӧрланьӧ, ызгӧ,
Зепсьыс лэчыд пуртсӧ кыскӧ:
«Мыссьыны тэ пырав,
Он кӧ — чушка нырад».
Мамыс дінӧ Сидӧр кырссьӧ:
«Мамӧ, ӧдйӧ менӧ мыссьӧд».
Чуймис мамыс:
«Вежсис сямыд?!»

Сэсся босьтіс паськыд вор,
Дзимбыр пызь да майтӧг тор,
Батьыс вайис лэчыд гогын,
Бабыс босьтіс гӧлик-рос.
Весалісны уна ногӧн
Коклябӧр и ныр, и кос:
Гаджи-гаджи, були-боль —
Гашкӧ, мыськисны час нёль!
Ворйысь петіс зонка бур:
Сӧстӧм чужӧм, еджыд юр.

Вӧччис Сидӧр быттьӧ оз —
Варов лои мыссян доз,
Кӧрт зыр сиис сылы бур,
Сынан шыльӧдыштіс юр.
Лои миян Сидӧрыд
Мича, сӧстӧм, идӧра.
Оз пов сыысь пон ни кань,
Быдӧн шуӧ: «Кутшӧм шань!»

Ӧні Сидӧр,
Ваньлӧн питор,
Быд асылӧ бура мыссьӧ,
Няйт пытшкӧ оз кыссьы,
Паськӧмсӧ оз шыблав,
Бус пиын оз пук,
Петас сійӧ ывлаӧ,
Быттьӧкӧ шӧвк туг.
Аттӧ, Сидӧр, ичӧт пи!
Сӧстӧм сылӧн ныр и ки!
Весиг пӧрысь дедӧ
Шуӧ: «Вежӧй петӧ!»