УЗЬ ЖӦ, ДОНА НЫЛӦЙ...


Вой тӧв сьылӧ ывла вылын,
Унмовсьӧма парма вӧр.
Узь жӧ, узь жӧ, дона нылӧй,
Кунь жӧ синтӧ, сьӧлӧмшӧр.

Мойда тэныд муслун йылысь
Сиа мича сӧстӧм вӧт.
Кытӧн колипкай мед сьыліс,
Сэсся нинӧм мед эн тӧд.

Узь жӧ, узь жӧ, муса нылӧй,
Унмовсь, зарни синма ныв.
Ме со крӧвать дорад сьыла...
Узян?.. Сьылӧмӧс он кыв?

Эновтла ме узянінтӧ,
Муна нимкодясигтыр,
Окышта ме куньса синтӧ.
Дона-й, узь жӧ... бура, дыр.

Югыд шонді аски асыв
Шуас тэныд мелі кыв:
«Менам югӧр ӧшинь тасын,
Чеччы сэсся, дона ныв!»