* * *

Коми му, чужан му миян тэ!
Зумыштчӧм, жугыльтчӧм му!
Бур олӧм сьӧлӧмсянь сиам тэд...
Повтӧг и веськыда пиянтӧ
Сувтлытӧг водзӧ пыр ну!

Жугыль йӧз оланін, кӧдзыдін,
Лун и во уджаланін!
Гӧльлуныд олӧмтӧ кӧдзӧдӧ,
Синватӧ пычкӧмӧн сӧдзӧдӧ —
Он вермы восьтыны син...

Йӧртӧма пармаӧ лёк йӧзыд.
Кӧдзыд сэн, вӧр-пуыс — тшем.
Лунысь-лун содӧма-сь шогъясыд...
Ӧтнадӧн кольӧма-сь вокъясыд
Сьӧд вӧрын колльыны нэм...

Пондылін корсьлыны лӧсьыдін
Лэптывлін сы понда зык.
Кӧсйылін бур олӧм лӧсьӧдны.
Весьшӧрӧ сьӧлӧмтӧ пӧсьӧдлін, —
Ӧнӧдз на пыр вӧлін тшыг.

Помтӧ эз аддзывлы удж тэнад.
Унаысь позявліс сой.
Озыръяс пессьӧмӧн-ружтӧмӧн
Эмбуртӧ, пӧсь тэнсьыд куштісны...
Сэк вӧлі сьӧд пемыд вой.

Ӧні нӧ чӧв мыйла олан тэ,
Зумыштчӧм, жугыльтчӧм му?
Мӧвпыштін гашкӧ важ олӧмтӧ?
Гашкӧ нӧ мыйыськӧ полан тэ?
Мыйысь нӧ?.. Нинӧм он шу.

Кузь туйӧ ӧтнадӧн петлывлін,
Эн повлы некодысь тэ:
Куш киӧн ош вылӧ ветлывлін.
Мукӧдлы шензянтор сетлывлін.
Тэныд-ӧ повнысӧ, тэд?!

Йи пытшкын быдтін тэ пиянтӧ,
Вӧр пывсян вӧлі тэд рай, —
Ёнмӧдін, чорзьӧдін сійӧн тэ...
Коми му, чужан му миян тэ,
Петкӧдлы ёнлунтӧ вай.

Югдӧма... Шондіыс петӧма,
Дзирдалӧ, пӧртмасьӧ, гӧрд, —
Комилы вын-эбӧс сетӧма.
Мездлунлӧн воропыс шедӧма.
Ён лои ки-кокным, кӧрт!

Тшыглунла вынъясным эз чинны,
Мывкыдным важ моз на бур.
Сувтлы вай гӧльлункӧд вензьыны —
Йӧзыс мед кутасны шензьыны....
Чатӧртчыв, пыркнитлы юр!

Кокньӧдны олӧмтӧ-вылӧмтӧ
Зумыда веськыда пет!
Пузьӧдлы сьӧлӧмтӧ... Кылан тэ
Том йӧзлысь гораа сьылӧмсӧ? —
Выль олӧм вӧзйӧны тэд.

Коми му, чужан му миян тэ!
Зумыштчӧм, жугыльтчӧм му!
Бур олӧм сьӧлӧмсянь сиам тэд...
Повтӧг и веськыда пиянтӧ
Сувтлытӧг водзӧ пыр ну.