ТУВСОВ ВОЙ


Эзысь югыд, тувсов войясӧй!
— Мыйла нӧ менам войясыс оз узьсьыны?
Кӧдзыд войвыв, тувсов войясӧй!
— Мыйла нӧ менам синъясӧй оз куньсьыны?
Тувсов войясӧй! Дженьыд войясӧй!
— Сӧмын ті весьт кузяӧсь!
Шоныд войясӧй! Гажа войясӧй!
— Тэрмасяд олыштнытӧ...
________

Май тӧлысся войясӧй!
Кыа куслытӧм войясӧй!
Вӧт кодь войясӧй!
— Майбырӧй ті, войясӧй!..
________

Кӧк горзӧм шыӧ ланьтысьӧй,
Колипкай дзользьӧм шыӧ узьысьӧй,
Ёдіюр садьмӧм шыӧ палялысьӧй,
Кокньыд унмӧн, кывзысигтыр,
Узьысьӧй тэ, войӧй!
________

Вой шӧр кад — лунъюгыдӧй,
Тэӧй, войӧй!..