МЕД НЭММАС ТАЙӦ ЛУН!
Чукӧрӧн лыддьӧм

Мед нэммас тайӧ лун — Первое Мая!
Югыд праздник Му пасьта уджлӧн!
Мед шондіыс выль олӧм-райлӧн
Ӧзъялас миян весьт дӧлӧн!

Кыдз вӧльнӧй лэбалан пӧткаяс,
Лэбзям ми бордъясӧн вывлань.
Бырӧдам йӧз костысь вежӧсъяс,
Шыблалам раб мисьтӧм нимъяс.

Кусӧдам нэмчӧжся лӧглун,
Ӧт-мӧд кост йӧзыслысь лёксьӧм.
Пузьӧдчам ӧтувъя семьяӧ —
Миян ӧткодь знамяным — гӧрд!

Мед кывзасны пемыд ловкуяс,
Мед лӧнясны нэм кежлас найӧ!
Гымалан сьыланкыв мездлунлы
Талун ми гораа сьылам!

Мед нэммас Воддза лун Майлӧн —
Югыд праздник уджалысь йӧзлӧн!
Мед югъялас шондіыс выль олӧм-райлӧн
Некорсӧ куслывтӧм биӧн!