* * *

Ми ставӧн коркӧ вӧвлім томӧсь,
Збойлунӧн, эбӧсъясӧн ёнӧсь.
Том руа думным, кыдзи чикыш,
Ёсь бордъяс вылас асывводзӧ
Выль лунлы паныд лэблӧ вильыш, —
Сідз тайӧ мывкыд сӧмын водзӧ,
Куш водзӧ зільліс лэбны, кайны,
Мед мирлы козин пыдди вайны,
Мый важӧн вӧвліс и эз вӧвлы,
Мед кӧдзны, быдтыны му вылын,
Мый некор эз на быдмыв, овлы,
Вын либӧ петкӧдлыны кылын,
Ас уджнад бӧрӧ кольны батьтӧ,
Бур йӧзсянь пӧлучитны аттьӧ.
Но кыдзи овлӧ, оз быд войтва
Усь-солькнит сӧстӧм визув шорӧ,
Дай шорас усьӧм уна войтва
Оз волы-петав море шӧрӧ.
Карабтӧ бӧрйиг олӧм вуджны,
Зон, прамӧя на колӧ кужны.