ВЕНІС


Ӧлексей Анукӧс вайис —
Гижсьӧмлы тырис кык во.
Кыкнанлӧн олан туй лоліс —
Висьтала, колӧкӧ, со:

Анук век вичкоӧ ветлӧ,
Сэрӧгын пельӧс тыр ен.
Быд асыв сись сэтчӧ ӧзтӧ,
Юрбитӧ мудзтӧдзыс сэн.

Ӧльӧлӧн уджыс кыдз эштас,
Лыддьысьны уськӧдчас пыр.
Листалас нига-газетъяс,
Лыддьысяс вой шӧрысь дыр.

Ануклӧн важ ногса батьыс
Вичкоын старӧста морт.
Сы кузя Ануклӧн юрсьыс
Ен вера зэв дыр эз ор.

Верӧсыс енлы оз эскы,
Гӧтыркӧд нуӧдӧ вен.
Кымынысь венлас жӧ эськӧ:
Петкӧдлӧ, мый абу ен.

Визув ва чорыд из весйӧ,
Сӧстӧма, мольыда зэв.
Ӧльӧ сідз гӧтырсӧ кӧсйӧ,
Важ туйӧд медым оз кев.

Сёрниӧн Ануклысь туйсӧ
Ӧльӧыд пановтіс сэк.
Сы юрысь ен вера нюйтсӧ
Весалӧ ньӧжйӧник век.

Ануклӧн олан туй вежсьӧ,
Лоӧма ӧні со мӧд.
Ен вера дум вывсьыс вешйӧ,
Оз нин тай пернапас лӧд.

Пельӧсысь шыблаліс енъяс,
Кевмӧмлы воӧма пом.
Сы пыдди ӧшӧдіс Ленин,
Кӧн вӧлі енъяслӧн чом.