* * *

Локтан коркӧ югыд ягӧ — 
Быттьӧ челядьдырся мойдӧ.
Быттьӧ ачыд на тэ кага,
Быттьӧ олӧмыс эз дойдав…

Быттьӧ ставыс сэтшӧм ясыд!
Мунан-мунан — енэж помтӧм.
Нинӧм оз ков тэныд аслыд,
Сӧмын овны эськӧ, овны!

Ӧні чукыръяса баныд,
Наысь некытчӧ он воштысь…
Сӧмын эм ӧд важъя тайна,
Тэныд ягыс сійӧс восьтас:

Мед кӧ, эз кӧ ставыс артмы,
Мыш саяд нин быттьӧ олӧм — 
Лолыд арлыдтӧ оз артав,
Лолыд нэмсӧ кольӧ томӧн…