МИРОН ДЕД ПИСЬКӦДІС ӦШИНЬ

Мыйыс сӧмын эз и вӧв Мирон дедлӧн сараяс: сьӧкыд изки, гыр, кӧні важӧн нин нинӧм эз тойны, путшкысян машина, ичӧтик пыж, кодӧс оз туй нин лэдзны ва вылӧ да кӧні кӧзяин видзӧ арын вотӧм пув, гӧн тыра пестер, кытчӧ сійӧ тшӧкыда дзеблывліс магазинысь гусьӧн вайӧмтор; стен бердын сулаліс верстак, а сы вылын — гӧтырыслӧн приданнӧй кӧлуй тыра сундук; сэні жӧ вӧлі ӧшлӧма кулӧмъяс, боталаяс, ветельяс, стен пӧлӧныс, верстак вылын жӧ, куйліс выль лызь гоз.

Но став тайӧ озырлуныс оз тыдав — сарайын вӧлі дзурс пемыд. Со мый вӧсна Мирон дед и мӧвпыштіс сэтчӧ восьтыны ӧшинь. Гӧтырыс эськӧ коркӧ нин шуліс:

— Миронӧ, вай сараяным югыд би нюжӧдам, Чумаковсӧ корлам да.

Но Мирон дед югыд би вылад эз ышты, а вочавидзис гӧтырыслы ӧти кинас мӧд кисьыс чуньяссӧ чегъявлӧмӧн:

— Электриклы мынтысьны — раз, да и ӧти дозйӧн Чумаковыд оз прӧймитчы. Выключатель, проводка, лампочка... Ставыс колӧ! — два. Счётчикыд бара жӧ ӧдйӧджык кутас бергавны — три. Ог, ог, югыд битӧг прӧймитчам. Ме со мый мӧвпышті, Марпа, — ӧшинь писькӧдам сараяным.

Ӧшинь кӧ, и ӧшинь. Марпалы мый — мед югыд вӧліс да эз ков тапъявны кималасӧн-а. Кӧсяк пуяссӧ дедлӧн вӧлі водзвыв нин дасьтӧма, да сӧмын сійӧ и вӧлі уджыс, медым пилитны стенас розь да кӧсякавны.

Ӧти бур асылӧ чеччис Мирон дед да мӧдӧдчис зятьыс ордӧ бензопилала. Воис, а кӧзяиныс буретш удж вылӧ нин пасьтасьӧма. Водз сылы колӧ мунны, сизим час кежлӧ.

— Чолӧм, зять!

— Чолӧм, чолӧм! Мый нӧ сэтшӧм водз талун ветлӧдлан, кутшӧм мог суис?

— Пилатӧ он али сетлы, гоз чеп да?

Петісны, да мыччис зятьыс чуланысь «Дружба» бензопила, а чепъяссӧ бӧрйис медся чирссьӧм пиньясаӧс.

— Чепъястӧ бурджыкӧс сет, мед кӧть пилитас. Тайӧ нӧ со мый — ур гыжъяс кодь нин пиньясыс.

— Бурсӧ ог сет. Важ стрӧйбаад гындысигӧн верман и кӧрт тувйӧ шваркнитны. Пилитас тшук-тшук.

Со и горт дорас нин Мирон дед. Пуктіс пиласӧ кильчӧ вылас да лэччис пывсян дорас, катӧдіс сэтысь кузь кокъяса люги-леги скамья, моздӧдіс сарай стен бердас. Видзӧдліс — чотӧ скамьяыс, да пуктіс ӧти кок улас поткӧдӧм пес чурка. Дедлысь ноксьӧмсӧ аддзис суседыс, Шыльыд Миш, да чепӧсйис ывлаӧ, дед дорӧ.

— Он-ӧ нин кӧсйы, Мирон Иванович, запаснӧй выход восьтны... на случай пожара?

Дед, гашкӧ, эз кыв, а гашкӧ, эз кӧсйы — нинӧм эз вочавидз. На дорӧ жӧ сэсся кежис совхозса бригадир Дымов, киасис Мишкӧд, а дедлы, коді ляпкӧдчӧмӧн лукйысис пилаас да вӧлі бригадирлань заднас, эз мыччы кисӧ, мед не торкны мортӧс уджалӧмысь, сӧмын тапкӧдыштіс мыш кузяыс: чолӧм пӧ и тэныд.

Бригадир бӧрын матыстчис Симон Ӧльӧш, сэсся бара кодкӧ да регыд нин Вань Мирон керка дорӧ чукӧртчис, гашкӧ, сиктса джын мужичӧйыс. Кутісны юасьны ӧта-мӧдыслысь, мый нӧ пӧ тані мунӧ, но некоді эз куж висьтавны, мыйла татчӧ ӧкмис та мында йӧз.

А Мирон дед асьсӧ тӧдіс: разис карбюратор, пӧльыштіс кутшӧмкӧ розьӧ, кытчӧкӧ вӧсни сутуга пом сюйліс, бӧр моздӧдіс карбюраторсӧ, зэлӧдіс отвёрткаӧн да тракнитіс стартёр. Пилаыс «пр-р-р» лэдзӧдіс, но эз босьт.

— Ловъя эськӧ да...

— Ловъянас ловъя, да бензиныс, думайта, ва сора.

— Абу сыын делӧыс, искраыс слаб, прӧверитны колӧ.

Разисны свеча.

— Ноко, Ӧльӧш, пуктыв чуньтӧ каллянас, а ме надзӧникӧн дёрнита.

Шыльыд Миш дёрнитіс да эз надзӧник, а мый вынсьыс, быттьӧ заводитігӧн нин. Симон Ӧльӧш гатшмоз усис Мирон дедлы кок улас, сэсся сувтіс да гачсьыс лыасӧ пыркӧдігмоз шуис:

— Искраыс пӧ слаб. Татшӧм искраыд ӧшкӧс вылӧ кокӧн шыбитас.

Кыдзкӧ-мыйкӧ артельӧн жӧ и лэптісны Мирон дедӧс кузь кокъяса скамья вылас, мыччисны сылы торгысь пиласӧ. Ӧльӧш на эськӧ шуліс, вай пӧ ме пилита, но дед сылы вочавидзис:

— Ачым восьта. Тіралысь кияснад пасйӧм визьяссьыс кежан да кӧсякъясӧй прӧпадитасны.

Со и сатшкысис чептыс стенӧ, кутіс йирны сійӧс да регыдӧн и пырӧдчис сарай пытшкӧсӧдзыс.

«Сэсся кокньыдджык лоӧ — сӧмын лэдз визь кузяыс», — мӧвпаліс Мирон Иванович. Чептыслӧн пиньясыс кӧть и бырӧмаӧсь нин, но выльӧн тӧчитӧма да вӧліны лэчыдӧсь. Ӧтилаӧ пилаыс друг джӧмдыліс, но бара кутіс йирны керъяссӧ важъя ӧдӧн. Пилипызькӧд тшӧтш мыйлакӧ кутісны лэбны гӧн да рузум торъяс.

«Паклясӧ нетшкӧ, сійӧн, тыдалӧ, и джӧмдалӧ пилаыс», — чайтіс Мирон дед.

Со ӧти боксӧ лои лэдзӧма, но чептыс ёна ныжмис да, ковмис вежны.

— Куритчы! — горзісны увсянь.

Мирон дед пуксис скамья вылас, ӧшӧдіс кокъяссӧ, картуз гугнас чышкис плеш вывсьыс войталысь ньылӧмсӧ, видзӧдліс вывсянь гӧгӧрбок. Нимкодь сылы талун вӧліс, мый асылыс сэтшӧм мича, шондіа, а медсясӧ нин сыысь, мый ӧдӧбсис, медбӧрын, сараяс ӧшинь восьтны. Нимкодь лоас и Марпаыслы, коді ӧні, дерт, чай пуктіс нин пузьӧдны.

Улын сулалысь мужичӧйяс баитісны ӧта-мӧд костаныс, мукӧдыс видзӧдлывлісны часі вылӧ — абу-ӧ кад мунны уджавны.

Мӧдар бокыс шедіс сьӧкыдаджык. Чептыс тшӧкыда кытчӧкӧ сибдывліс, «пакляыс» кутіс локны унджык, чеп гӧгӧр ворсісны би киньяс. Медбӧръя керйыс эзджык ор, сэтчӧ пилаыс джагаліс дзикӧдз.

«Но, тайӧс сэсся позьӧ нин черӧн сӧтны», — думыштіс дед да мыччис кодлыкӧ доналӧм пиласӧ. Ачыс лэччис жӧ, видзӧдліс ылісянь, абу-ӧ кытшыля пилитӧма, да пырис сараяс, медым восьтны ӧшинь местасӧ, чужъявны ортсӧ пилитӧм чуркаяссӧ.

...Со и пырис мича асывлӧн югӧрыс пемыд сарайӧ. Но пемдісны Мирон дедлӧн синъясыс, кор аддзис аслас киясӧн вӧчӧмторсӧ... Верстак вылын куйлысь лызь гоз вӧлі пилитӧма шӧри. Пилитӧма, кытчӧдз судзӧма пилаыс, верстаксӧ. А кор аддзис гӧтырыслысь шӧри орӧм сундуксӧ, тіравны кутіс быдсӧн.

— Но и сё пакӧсь, но и сё пакӧсь, — балябӧжсӧ гыжъялігмоз шуаліс вомгорулас дед.

Сарайӧ чепӧсйис гӧтырыс.

— Но и бур дела вӧчӧмыд, Миронушка, югыд лоӧ ӧні. — Сэсся матыстчис дедыс дорӧ. — Мый нӧ тайӧ, Мирон? Лызьястӧ абу-ӧ шӧри пилитӧмыд? Верстаксӧ дай... а сундуксӧ нӧ мыйла? О-о-о! — вӧлисти на лёк ногӧн омлёвтіс Марпа, кватитіс орӧм лызьлысь нырладорсӧ да кыкысь лэдзліс дедыс мыш вылӧ. Ывлаын сулалысь мужичӧйяслы ӧшинь розь пырыс тыдаліс тайӧ концертыс, да найӧ пондісны куснясьӧмӧн серавны. Сиктын ылӧдз кыліс Мирон гӧтырлӧн дедыс вылӧ зыксьӧмыс. Сэсся Марпа пыраліс горничаас сундук ключысла, восьтіс сундуксӧ, кутіс перъявны сэтысь шӧвк, ситеч, сатин лестукъяс — нывдырся сарапанъясыслысь колясъяссӧ.

— Тэ эськӧ ачыд шӧри пилитанторйыс да!.. И кыдзи тэнад сямыд эз тырмы водзвыв вештыны ставсӧ стен дорсьыс? А ӧні мый? Со, видзӧдлы, видзӧдлы буби синъяснад, мый вӧчӧмыд! Ни ӧти платтьӧ дзонь абу кольӧма.

Сэсся босьтіс верӧссӧ шошаӧдыс да люкӧдіс нырнас, кыдз сорсьӧм каньӧс, бонзьӧм кӧлуйланьыс.

— Но ланьт, ланьт, — шуаліс Мирон дед, — мый лоӧма — лоӧма нин. Мыжа, дерт, но эн шогав бакшасьӧм кӧлуй вӧснаыд. Экономитны тай кӧсйылі, да... Сӧвикӧ на абу сюрӧма чеп улас, да сійӧ бур... А ӧшиньыд лоис, лоис! Мун чайтӧ пузьӧд, шыдтӧ лӧд, яйтӧ крӧшит.