БӦРА «ПЯТЬ»
— Талун ми нуӧдам дженьыдик асшӧр удж, видзӧдлам, кыдзи ті тӧданныд историяысь вӧвлӧмторъяс. Мед та вылӧ воштыны этшаджык кад, ме кута висьтавлыны лоӧмторсӧ, а ті тетрадяныд сӧмын пасъянныд восӧ, — шуис Василиса Николаевна история урок вылын.
Гриша, кыдзи и век, небӧгсӧ гортас эз восьтлы да датаяс кузя юрас сылӧн вӧлі гудыр ва сяма, нинӧм эз помнит, но, воддза парта сайын пукалігӧн мый вылӧ кӧ век жӧ надейтчис. Василиса Николаевна судзӧдіс картонысь вӧчӧм книга мыш сяма, кодӧс шуӧ буклетӧн, сэтчӧ ӧтар бокас гижалӧма лоӧмторъяс, а мӧдарас — вояссӧ. Велӧдысь заводитіс лыддьыны, а велӧдчысьяс мӧвпалісны да пасъялісны тетрадяныс, кутшӧм воӧ, на серти, вӧлі тайӧ. Сӧмын Гриша нинӧм эз гиж, пукаліс зуньгыртчӧмӧн. Но, сылӧн шуд вылӧ, Василиса Николаевна кусыньтіс буклетсӧ да юалӧмъяс вылас вочакывъясыс лоины Гришаладорын. Детинка ловзис. Сійӧ зэв зіля вуджӧдаліс велӧдысьлӧн буклетысь датаяссӧ аслас тетрадьӧ. Майбыр, оз весиг ков думайтны! Аддзынытӧ сійӧ бура аддзӧ, синмыс бур.
Асшӧр удж эштіс. Велӧдысь чукӧртіс тетрадьяс. Гришалӧн зэв кыпыд лов вылас, нюмыс вомас оз тӧр, сідзи и вӧзйысьӧ ортсӧ. Ӧд тӧдӧ, «5» сылӧн зептас нин.
— Вай ӧні жӧ видлалӧй уджъяссӧ, — корис сійӧ Василиса Николаевналысь.
— Мый, оз терпитсьы, — нюмдіс мӧдыс. —Аскиӧдз виччысьыштлы нин.
Гортас детинка весиг ошйысис мамыслы:
— Талун историяысь асшӧр удж гижим. Ставсӧ кужи.
— Дерт?… — эскытӧма видзӧдліс сы вылӧ мамыс.
Мӧд урок вылын Василиса Николаевна тӧдмӧдіс велӧдчысьясӧс оценкаясӧн асшӧр уджысь. Гриша сідзи и педзӧ, быттьӧ ем вылын пукалӧ. Ачыс эськӧ тӧдӧ, мый сылӧн «5», но ӧд мукӧдыс оз на тӧдны. Сійӧ ӧти вылӧ видзӧдлас, мӧд вылӧ… Но Василиса Николаевналӧн кывъясыс лоины жар пывсянын йиа ва кодьӧн:
— Менӧ зэв ёна шогӧдіс Гриша, коді лючки вочавидзӧма сӧмын ӧти юалӧм вылӧ, а мукӧдсӧ сэтшӧма гудралӧма, мый и висьтавнысӧ оз позь. Сы ногӧн кӧ: Александр Невский немецкӧй рыцаръясӧс Чудскӧй Ты вылын нӧйтӧма 1945 воын, Куликовскӧй битва вӧлӧма 1812 воын, Наполеон уськӧдчылӧма Россия вылӧ 1941 воын. Бара ковмис «2» пуктыны, нинӧм он вӧч.
Гриша пукаліс дзик рушмӧм кушман кодь чужӧма, мый-мый, а татшӧмсӧ некыдзи эз виччысь. Ӧд став датасӧ сійӧ мичаа вуджӧдіс Василиса Николаевналӧн таблица вылысь, но эз куж чайтны, мый велӧдысь лыддис лоӧмторъяссӧ улісяньыс, а Гриша вочакывъяссӧ гижаліс вылісяньыс.
