ОШ ВАСЬ

Оштӧ лыйигӧн, зонъяс, медшӧрыс, оз ков повзьыны... Мед сійӧ тіянысь полӧ. Киыд кӧ тіралӧ, сэки пуляыд сынӧдас вермас веськавны.

Газетъясад тай гижлӧны: овлӧны пӧ и кык сьӧлӧма йӧз... А ошъясыс нӧ оз?

Но, шуам, лыйин тэ ошкыслы, веськалін сьӧлӧмас, а сійӧ ловъя. Вот сэки и пачесайтас Микайлӧыд тэнӧ! Та вӧсна пыр колӧ витны ошкыдлы юрас. Сійӧ сылӧн ӧти... — велӧдіс том йӧзӧс РОВД-лӧн дежуркаын Семён Вась.

— Ачыд нӧ, Василий Семёнович, кымын ошкӧс кыйлін? — юаліс кодкӧ.

— Ме, зонъяс, абу браконьер, — тшӧкмунліс Семён Вась. — Вӧр-ватӧ ог кушты. Колӧ кутны экологическӧй равновесие. Кывлінныд, мый сійӧ сэтшӧмыс? Ӧтилаын кӧ мыйкӧ чинӧ, вӧр-ваыд пыр жӧ сэтчӧ мыйкӧ содтас, да нӧшта сэтшӧмтор, мый миянлы ньӧти оз лӧсяв. Та вӧсна зэв гежӧда ош вылас ветлывла. А вот томдырйи кыкысь паныдасьлі вӧрса кӧзяиныдкӧд. Сы йылысь верма висьтыштны, кывзанныд кӧ быттьӧ.

— Кывзам, кывзам, Василий Семёнович, — ыззьӧдісны сійӧс том йӧз.

— Но инӧ... Том на вӧлі, ар дас вит-дас квайта. Батьӧлӧн уна лэч туйыд, да меным тшӧктыліс дӧзьӧритны медся матыссасӧ... Муна ӧтчыд лэч туй кузя, а аслым любӧ! Батьӧлӧн важ ружьеыс пельпом сайын. А воыс сэки лёк вӧлі: тусь, ни тшак, ни пӧтка. Мамӧ сетіс чуман, мед мый аддза, сійӧс сэтчӧ и тэча. Довга надзӧникӧн ордым кузя. Ружье пельпом сайын, а лыйны некодӧс. Вои Чужмӧр Ёль дорӧ, а сэні сэтӧр кустъяс. Сувтӧді ружьеӧс мыр бокӧ, сэтӧр вота. Видзӧднысӧ быттьӧ эм, а чукӧртны кутан, да оз сод. Но мый воті — воті. Ружье босьті да водзӧ мӧді. Аддзи ньыв пу бокысь зэв мича ягсер, бара пӧрччи ружьеӧс, мешайтчӧ ӧд гӧрбылясьныыс. Сувтӧді пу бокас, вунді ягсертӧ, чуманӧ дзумги, и бара водзӧ лэч туй каття. Верст кымын, думысь, муні. Казялі да, мыйкӧ зэв кокниа восьлавсьӧ, пельпом сайын нинӧм оз мешайтчы. Тап-тап веськыд пельпом сайӧс — ружьеӧй абу! Нетшыштчи бӧрвыв. Думайта, ньыв пу дорас вунӧді, кытысь ягсертӧ босьті. Вои сэтчӧ, а видзӧда да, ружьеӧй абу. Сё дивӧ тай! Тшук сэтӧр вотанінад. Муні сыланьӧ. А зэв бура помнита, кыдзи мыр бокас сувтӧді. «Да-да, сэні и эм», — ачымӧс тадзи такӧда. Вои Чужмӧр Ёль дорӧ, и сэні ружьеӧй абу! Мый сэсся керан? Кыдзи батьӧ водзын правдайтчыны кута? Брӧд ва пӧсялі, быдсӧн юрси йылӧд визувтӧ ньылӧмӧй. Надзӧникӧн бара водзлань мунны куті, а ачым думайта: «Гашкӧ, нӧшта на кытчӧкӧ пуктылі?» Локті ягсер босьтанінӧ, видзӧда да... Эсканныд он? Ружьеӧй ньыв пу бердад сулалӧ, менӧ виччысьӧ... Ӧніӧдз ог тӧд, кыдзи сідзисӧ вермис лоны. Ӧд ӧтарӧсӧ мунігӧн зэв бура видзӧді: пу дорас нинӧм эз вӧв. Кодкӧ нарӧшнӧ шмонитіс ме вылын али мый?

Но, сэсся сьӧлӧмӧй местаын нин. Водзӧ муна: лэч туй кыя, тшак босьтала. И друг джӧмді быттьӧ. Видзӧда да — паныд ош локтӧ. Зэв тай ыджыдӧн меным сэки кажитчис-а. Сулала, сы вылӧ видзӧда, а ошкыд — ме вылӧ. Надзӧникӧн лэдзи чуманӧс му вылӧ, пельпом сайысь ружьеӧс босьті, сьӧла зарад перйи стволысь да сюйи ӧтка пуляа патрон. Окті куроксӧ и ньӧжйӧникӧн лэпті пищальӧс, виті бура. И вочасӧн-вочасӧн личка лыян вылас, кыдзи батьӧ велӧдліс. Личка, а лыйӧм шы оз кыв. Мый вынысь нин личка, а ружье век оз лый. Казялі да — водз чуньӧй, вӧлӧм, оз кусыньтчы. Повзьӧмӧйла кынмӧма веськыда да сідзи и кольӧма. А ошкыд сэсся кежис, весиг эз виччысьыштлы. Гортӧдз пыр сідзи веськыдӧн и вӧлі чуньӧй, узьӧм бӧрын тай прӧйдитӧма жӧ-а. Тайӧ менам вӧлӧма шок, кыдзи тай шулӧны... Да-а-а...

А мӧдысьсӧ ме неуна ыджыдджык нин вӧлі. Сійӧ жӧ лэч туй кузяыс тапикта. Чужмӧр Ёль дорын пыр пажнайта ӧти местаын: бипур места дась, мӧтыр лӧсьӧдӧма и, сӧмын ва гумовт да би чуткы. Личӧдчи, нопйӧс пӧрччи, ружьеӧс мыш сайӧ пу бокӧ сувтӧді. Перъялі нопйысь сёянтор. Лӧня сідзи мошкоритча, кӧсъя биасьны. И мыйкӧ эз ло лӧсьыд сьӧлӧм вылын. Синъясӧс лэпті да шемӧсми: меланьӧ ордым шӧрті тапиктӧ Микайлӧ Иванӧвичыд! Мед не повзьӧдны, гусьӧникӧн пу бокысь босьті двустволкаӧс... Сэки ыджыдджык ружье нин новлӧдлі. Кыкнан куроксӧ окті, веськӧді сьӧдруд гӧна Мишӧ вылӧ. Лӧсьыда метитчи, мед ог жӧ бокӧ веськав. Личкышті ӧти кручоксӧ, ружье эз лый — осечка! Мӧдсӧ — бара осечка! Мый нӧ тайӧ, бара али мый чуньӧй оз куснясь? Видлі — куснясьӧ. А ошкыд менӧ казяліс, боквыв бергӧдчис да сӧмын утьыштіс туй вывсьыд! Сы мында ме сійӧс и аддзылі.

Бӧр бергӧдчи ружьеӧс пу дорӧ сувтӧдны, кватитчи да — пищальыд сэні.

— А мый нӧ эськӧ киад вӧлі? — шызисны том йӧз.

— Киам? Мӧтыр…