КЫДЗИ НӦ РОЧНАС?

Сьӧкыд, кор рочнад он куж. Евлог со нёль арӧссянь нин велаліс лыддьысьны, но сӧмын комиӧн. А роч пиысь кутшӧмӧскӧ небӧгтӧ восьтлас, да нинӧм сэтысь оз гӧгӧрво. Учительница Василиса Николаевна аддзӧ детинкалысь нырасьӧмсӧ да козьналӧ сылы роч буквар. Но и сэтысь омӧля жӧ гӧгӧрвоан, кӧть и морта книгаыс. Со серпасалӧма детинкаӧс. Сійӧ пукалӧ пызан сайын да сёйӧ. Уліас гижӧма: «Роман ест». Позьӧ гӧгӧрвоны, мый Роман — тайӧ нимыс. «Ест» — сійӧ тшук лоӧ сёйӧ. Коминас, кӧнкӧ: «Роман сёйӧ». Орччӧн мӧд серпас: детинка сідз жӧ пукалӧ, киас кутӧ чашка. И гижӧд: «Роман пьёт». «Пьёт» — сійӧ, дерт, лоӧ пӧт. Сёйис-юис да пӧтіс. Артмӧ: «Роман пӧт». Коймӧд серпас: детинкаыс чеччӧма пызан сайсьыс. Уліас гижӧд: «Роман сыт». Тайӧ бара мый лоӧ-а? Мый сэсся Романыс вӧчӧ? А-а! Гӧгӧрвоана! Эськӧ сарайӧ петалӧмтӧ позьӧ вӧлі и не гижны. А сэссясӧ и дзик нин гӧгӧрвотӧм. Эновтлыны ковмас тайӧ роч буквартӧ.

Евлог — зэв писькӧс морт. Кывліс, кыдзи Василиса Николаевна шуис роч кыв да содтіс, мый сыла ветлас. Детинка эз вунӧд тайӧ кывсӧ да кыйӧдіс, мый жӧ ваяс учительницаыс. А сійӧ вайис ва.

Евлог воис гортас да юалӧ ыджыд мамыслысь:

— Вот эськӧ кыдзи рочӧн ваыд лоӧ?

— Вода кӧ-а?

— Абу. Водаыд сійӧ узьны водӧм. А ваыд рочнад лоӧ аждвао, тадзи Василиса Николаевна шуис.

— Сійӧ, дерт, велӧдчӧм мортыд, тӧдӧджык. Ноко, выльысь висьтав.

— Аждвао!

— Но-о-о, зэв тай сьӧкыд кыв.