КАНИКУЛЪЯС ДЫРЙИ

Заводитчисны тӧвся каникулъяс. Федя Подоров бара нин нуӧдӧ другъяссӧ кыйсьыны.

— Мунад аски мекӧд Сизь тыӧ? Чериясыс пӧ сэні куш вугыр вылӧ и то кутчысьӧны.

Лёвалы кӧть абу окота лунсӧ воштыны, кино вылӧ сьӧлӧмыс кыскӧ, но Федялӧн висьталӧмыс и сійӧс вӧрзьӧдіс. Коля Сватов накӧд жӧ лӧсьӧдчӧ мунны.

Аскинас пемыднас на и мӧдӧдчисны. Автобусысь петӧм бӧрын лэччисны Чов ю вылӧ да заводитісны веськыдавны. Лымйыс таво зэв на ляпкыд, лямпа ни лыжи оз ков, кокъясыд сӧмын мед вӧліны чожӧсь.

Сулаліс кос поводдя, абу ёна кӧдзыд. Тӧвся кадад ывлаыс мича: гӧгӧр еджыд да сӧстӧм. Пуяс гыӧртӧмаӧсь, вӧччӧмаӧсь еджыд паськӧмӧн. Эжва вылын кодкӧ пыридзасис. Детинаяс матыстчисны да аддзисны пӧрысь мортӧс. Сы вылын дженьыдик пась, кокас колошиа ыджыд гынкӧм, ус-тошкыс дзормыштӧма.

— Мый нӧ вӧчан, дедушка? — юаліс Лёва.

— Мый нӧ вӧчлӧны ю вылын... Кыйся, горш налимъясӧс кыскала, медым омӧльджыка бырӧдасны посни чериясӧс.

Мыйӧн артмис йи вылӧ вель ыджыд розь, дед босьтіс коколюка моз крукыльтӧм кыз сутуга, лэдзліс сійӧс йӧрданас да кыскис подольник. Детинкаяслы вывті нин окота вӧлі видзӧдлыны, шедас оз мыйкӧ пӧрысь мортлы.

Дед лэптіс вель ыджыд налим, сэсся недыр мысти мӧдӧс.

— Вот тайӧ кыйсьӧм, абу йӧршъясыд, — дивуйтчис Лёва да тяпкӧдіс вомсӧ, быттьӧ паняліс нин налим юква.

— Меным некор на татшӧм гырысь чериыс эз шедлы, — балябӧжсӧ гыжъяліс Коля Сватов.

— Вын пуктан — и чери сёян. Сӧмын вот киясӧй кынмӧны, — варовитіс дед. — Эн пӧрысьмӧй, бур пиян.

Не Федя кӧ, детинкаяс дыр на сулалісны дед дорын, вывті нин лӧсьыд видзӧдныд дась черияс вылад.

Куим друг лунтыр кыйсисны Сизь тыын. Федялы, дерт, шеді, а Лёвалӧн да Колялӧн бара зепъясныс кушӧсь, не кӧ лыддьыны гоз-мӧд йӧршӧс да чунь кузя кельчиӧс. Наысь ӧд юкватӧ он пу.

Бӧрсӧ локтігӧн, кор воисны дедӧн кыйсян местаӧ, Лёва ыджыда ышловзис да Колялы шӧпнитіс:

— Сватов, аски волам татчӧ, лэптавлам подольникъяссӧ.

Коля воча кыв пыдди мигнитіс Лёвалы.

* * *

Мӧд луннас Коля да Лёва и збыльысь мӧдӧдчисны пакӧститчыны. Мунісны Федяысь гусьӧн, медым аслыныс унджык сюрӧ.

Дедлӧн подольник лэдзан йӧрданыс абу на удитӧма ёна кынмыны. Пыридзнад ӧти здукӧн и розьӧдісны. Асьныс полӧны жӧ, мед кӧть найӧс кыйсьысьыс оз су, кыйкъялӧны гӧгӧр, тэрмасьӧны. Босьтісны чери кыйысьлысь лым пиӧ дзебӧм проволокасӧ, заводитісны корсьны подольник.

Ӧти здукӧн дед подольникысь нёль налим перйисны, сэсся подольникъяссӧ лёк ногӧн бӧр шыбитісны ваӧ и айда гортӧ. Юксисны, эз ӧбӧдитны ӧта-мӧдсӧ. Любӧысла тойласьӧны, дурӧны. Со кутшӧм кокниа налы налимъясыд шедісны.

— Аски бара ветлам, — ышӧдіс Коляӧс Лёва.

— Сӧмын Федькалы немтор эн висьтав.

— А мамъяснымлы кыдзи висьталам?

— Шуам, вуграсьны ветлім, — велӧдіс Лёва.

— Оз кӧ веритны? — майшасис Коля.

— Талун дзеблы черитӧ, а аски вугыр шать босьтам да йӧршъясӧс тшӧтш кыям, сэки кокньыдджык лоӧ пӧръявны найӧс.

Но пакӧститчысь детинкаяслысь кӧсйӧмъяссӧ торкис кыйсьысь дед. Кыдзи тайӧ лои, асьныд лыддянныд.

Рытъявылыс Лёва ордӧ пырисны Федя да Коля.

— Лёва, школаӧ мунам. Талун сэтчӧ локтӧ кутшӧмкӧ важ коммунист. Вожатӧйным тшӧктіс чукӧртчыны дзик пыр.

Воисны школаӧ, а сэні челядь тырыс нин. И учительяс локтӧмаӧсь. Сэсся коркӧ и воис гӧсть, воротника выль пальтоа, тошсӧ шыльӧдӧма, усъясыс чурвидзӧны ортсӧ, быттьӧ лэбзьыны кӧсйӧны. Гӧстьӧс пӧрччӧдісны, пуксьӧдісны сцена вылӧ.

Лёва видзӧдліс дед вылӧ да сэтшӧма повзис, мый став тушаыс кӧдзавлі.

— Тайӧ сійӧ... Кыйсьысьыд...

Пӧрысь мортӧс тӧдісны и Федя да Коля, кодъяс пукалісны Лёвакӧд орччӧн. «Друг да тӧдас, яндзимысла сэки кувны ковмас», — майшасис сьӧлӧмыс Колялӧн. Сійӧ поліс весиг видзӧдлыны сцена вылӧ.

— Челядь, талун миян дорӧ локтіс ыджыд гӧсть, Модест Иванович Чарин, — заводитіс сёрнитны вожатӧй. — Сійӧ висьталас тіянлы, кыдзи уджалысь йӧз ветымын во сайын тышкасисны выль олӧм лӧсьӧдӧм вӧсна.

Ставӧн кутісны клопайтны кияснас. Модест Иванович сувтіс кузь пызан помӧ, малыштіс чукырӧсь кияснас паськыд тошсӧ, сэсся вӧлисти мӧдіс варовитны. А висьталіс сійӧ унатор; и кыдзи штурмуйтлӧмаӧсь Зимньӧй дворец, и кыдзи нӧйтлӧмаӧсь белогвардеецъясӧс да ылі муясысь волӧм буржуйясӧс. Уна пара син видзӧдісны ичӧтик тушаа коммунист вылӧ, пельяссӧ чошкӧдӧмӧн кывзісны сылысь быд кыв. Сӧмын Лёвалӧн да Колялӧн синъясыс оз вермыны видзӧдны дед вылӧ, яндзимысла багралісны пельясныс и чужӧмныс.

Кор Модест Иванович помаліс висьталӧмсӧ, вожатӧй ӧшӧдіс сылы сьыліас пионеръяслысь гӧрд галстук.

Гӧсть копыртліс дзормӧм юрсӧ велӧдчысьяслань да чургӧдіс водзлань кисӧ.

— Тіянлы, дона челядь, нуӧдны водзӧ миянӧн заводитлӧм уджсӧ.

И бара сылы клопайтісны.

Тайӧ рытнас Лёва да Коля дыр вашкӧдчисны, мый налы вӧчны гусялӧм черинас, кыдзи шыльӧдны лёкторсӧ, кодӧс вӧчисны пӧрысь мортлы.

— Ме сэсся дзик некор ог кут пакӧститчыны. Вот аддзылан, — нурбыльтіс Коля Сватов.

— И ме...

Тадзи помасис тайӧ сьӧкыд сёрниыс.