МЕДСЯ ИЧӦТ ЛЭБАЧ

Сявкнитіс шочиник шоныд зэр. Кӧтӧдыштіс пуяслысь шоналыштӧм лапъяссӧ, сэсся выльысь мыччысис шонді.

Синмӧн судзӧдны позьтӧм сьӧд вӧрсӧ прӧсека торйӧдӧма кык пельӧ. Ляпкыдик мыр вылӧ пуксис ичӧтик-ичӧтик, пемыдвиж юра королёк да тэрыба кутіс кокавны гагъясӧс, кодъяс дзебсьӧмаӧсь сісьмӧм мыр пытшкӧ. Мыйкӧ дыра мысти сійӧ котраліс нин косьмӧм пу вылын, видзӧдлас кырсьяс костӧ, дженьыдик нырсӧ сюйлас быд щелльӧ.

Миян вӧръясын олысь лэбачьяс пиысь королёк медся ичӧт, веситӧ ставсӧ некымын грамм. Дарӧм тай ичӧт, а сёйныс ён. Во чӧжӧн вӧръясысь сійӧ бырӧдӧ миллионысь унджык гагӧс да пучӧйӧс — мортлы вӧчӧ ыджыд буртор, видзӧ пуясӧс висьмӧмысь. Таысь сылы пасибӧ позьӧ висьтавны.

Королёк позъялӧ пожӧм да коз пуяс вылӧ. Ассьыс резинӧвӧй мач кодь гӧгрӧс позсӧ сідз ӧшӧдас пу лапъяс костӧ — дінтіыс мунан, а он аддзы. Колькъясыс анькытш кодь посниӧсь.

Тайӧ ичӧтик лэбачсӧ аддзывлан зэв шоча. Сійӧ олӧ ёнджыка ылі вӧръясын. Ӧтлаавны кӧ королёкӧс коми пармаса медся ыджыд пӧткакӧд — чукчикӧд, сы дінын сійӧ эськӧ кажитчис «лилипутӧн». А пуктан кӧ найӧс вески вылӧ, тыдовтчас татшӧмтор: пӧрысь чукчи сьӧкыдджык королёкысь матӧ тысяча пӧв.